Prome Minister Evelyn Wever-Croes siman pasa a reuni cu e representante di Reino Hulandes den Caribe, señor Erwin Arkenbout. Recientemente señor Arkenbout a wordo nombra na e posicion aki y esaki tawata su prome reunion cu Prome Minister di Aruba.
Prome Minister den su conbersacion cu señor Arkenbout a splica cu e maneho di Gabinete Wever-Croes riba e tereno di Reino ta cu Gobierno di Aruba ta kere den un relacion den Reino basa riba madures politico y respet mutuo.
Cu madures politico, Prome Minister ta referi cu Aruba ta atende cu su problema y retonan su mes y solamente lo bati na porta di Hulanda pa ayudo ora cu realmente nos tin mester di haci esaki. Dus nos lo no haci mas loke a wordo haci den pasado unda cu pa cualkier cos Aruba ta bati na porta di Hulanda. Y pa e parti di respet mutuo, Aruba ta trata Hulanda cu respet y ta spera un trato di respet tambe for di Hulanda.
Prome Minister a enfatisa cu e relacion na e momentonan aki cu reino ta bon y ta basa riba madures politico y respet mutuo manera Aruba semper a indica. Aruba tin retonan hopi grandi su dilanti ainda, pero cu curashi ta enfrenta e retonan y cu determinacion pa soluciona nan na un forma structural y duradero.
Esaki, segun e mandatario prinicipal di nos pais, a nota cu a cay den hopi bon tera cerca e representante di Reino, mirando cu asina tin menos espacio pa friccion den futuro. Prome Minister a pidi si comprension di Reino especialmente di Hulanda pa e hecho cu e comunidad di Aruba por carga solamente locual cu awo aki tin riba su tayo.
“Nos pueblo no por carga mas y tampoco ta husto cu ta e pueblo mester paga pa e disaster y mal desicionnan cu a wordo haci door di e gobierno anterior. Gabinete Wever-Croes ta haci su maximo esfuerso pa saca Aruba for di e abismo cu el a haya Aruba den dje y ta percura pa pone Aruba atrobe riba e rumbo corecto pa loke ta su finansas pero sin lubida y sin perde na bista e ser humano y e necesidad di pueblo cu ta wordo poni central”, Prome Minister Evelyn Wever-Croes a indica.