Functiehuis
Den e dos parti di su reaccion Parlamentario Edgard Vrolijk ta lamenta cu for di 2016 cu e Functiehuis ta benta den parlamento, sra. Jennifer Arends-Reyes no a haci ningun esfuerzo pa pasa esaki y awe kier papia riba dje. For di veld a bin hopi obheccion y un di nan ta e descripcion por ehempel di cu un cabesante di scol ta mescos cu e waarnemend, pero den scolnan cu menos cantidad di mucha e waarnemend tin di duna les como docente y alaves ta carga responsabilidad mescos cu un cabesante pero no ta haya ningun compensacion. Banda di esaki e cambio lo duna e docente e prome aña algo mas di 20 florin di aumento y djis imaginabo un docente cu tin 56 aña y tin 18 aña cu mesun salario, cu e aumento aki con e lo sintie? Y sigur ora wak con su posibilidad di crece prome cu 65 aña ta nada. Y e manera con e peso di comunidad a baha riba docentenan mi ta kere cu mas pronto posibel mester caba cu esaki pero sigur pasando algo cu tur hende lo por biba cune. P’esey mi a percura pa recientemente pasa un mocion den parlamento mirando e echo cu e docentenan ta ser perhudica y tin varios cu ya a ser perhudica pasobra nan a laga 38 aña hopi tempo caba, mientras ta trahando riba e functiehuis. E meta ta pa drecha y pa por lanta e edad di aumento segun e structura existente te cu 46 aña y p’asina por salvaguardia e grupo grandi cu ya a ser perhudica. Y lo ta bon pa Jennifer splicanan tambe y principalmente e consecuencianan pa e cuerpo di docentenan pa loke ta e NPR 2014 cu el a pasa hunto cu su gobierno pa nan pensioen.
Mi ta pone mi mail: [email protected] pa docentenan manda nan feedback riba e functiehuis pa mi por haci e cambionan necesario y percura pa pusha e ley aki y p’asina porfin e cuerpo di docentenan por sigui traha den tur trankilidad.
Trahando riba mas scol cu airco
Segun mi persona tin hende ta bin trabao pero ta na soño. Pasobra Minister di Enseñansa a anuncia e nombernan di scolnan cu ta na beurt pa yega na airco. Maske Minister su presupuesto ta limita y cu un scol trankilmente ta pasa 200 mil florin pa instalacion di coriente y airco pero el a crea espacio pa esaki. Banda di esaki Prome Minister y entre otro Minister di Turismo tambe ta haciendo rekensomnan pa nan por yuda den e proceso aki p’asina mas liher posibel otro scolnan cu no ta riba e lista actual di Minister di Enseñansa tambe por yega na airco. Y si Jennifer Arends-Reyes tabatin e interes y boluntad den periodo di nan gobernacion e por a logra pa tur scol por tabatin airco si e no a permiti Richard Arends strica placa di NV’s y tambe pidi banda di Green Conference pa pone placa pa scolnan y no pa amigonan of famia hopi cercano haya contract pa drecha autonan den NV’snan. E prioridad di Jennifer tabata acomodacion financiero pa famia prome cu abo como docente y mi ta ret’e pa bisa cu no ta asina. Y pa loke ta Solar Panels, si tin di haci escogencia mi ta kere cu tur esnan cu no tin airco na scol lo scoge pa airco prome cu Solar Panels.
Arubalening pa studia na IPA aplicabel pa esnan te 40 aña
Motibo ta facil, tin scarcedad di maestro. P’esey minster a habri e espacio aki. Pero p’ami esaki lo no atrae un grupo grandi tampoco y lo no soluciona e problema di falta di docente. Nos tin di haci un evaluacion cuanto y den ki area falta docentenan. Y na eseynan bo ta adapta bo curiculo pa por tin mas mucha cu por studia diferente ramo den docencia pero tambe mi ta kere cu si nos aplica e sistema manera na Scol di Polis, esta di paga esnan den opleiding equivalente na ora bo ta drenta cu por ehempel 21 aña, lo hacie mas atractivo pa haya mas mucha pa studia pa docente cu e ta actualmente caminda bo ta haya 6000 florin cada 6 luna. Pues den e direccion ey nos tin di bay y tambe hinca mas placa den innovacion p’asina nos docentenan tambe ta equipa pa futuro di enseñansa.
Tempo pa hunga populista a pasa caba y p’esey mi ta apela na cada docente pa revisa e functiehuis y mandami via [email protected] boso obheccion p’asina haci e cambionan pa por trata esaki mas pronto posibel den parlamento. Uni nos por logra pero den desunion y hungando populista nos no ta yega niun caminda y spera cu Jennifer Arends-Reyes studia e materia aki y mandami su obheccionnan tambe .