Nos por a tuma nota cu sr. Mike Eman despues di su anuncio di retiro di politica ta bek. Alabes nos por a tuma nota cu su persona porfin a cuminsa lesa relatonan di Banco Central pasobra den 8 aña e no lesa ningun y locual cu awo e ta lesa y trata na punta dede na otro gobernacion, ta nada otro cu resultado di su gobernacion pesimo. Nos a tuma nota di su bishita na Kamer van Koophandel cu ta su derecho pero ta netamente su persona ta autor di ciere di mayoria tienda den Caya Betico Croes y sigur Kamer van Koophandel no por lubida con malo Mike Eman y su simpatisantenan a comporta nan mes den un debate organisa pa Kamer van Koophandel, unda cu a mustra cu e no ta respeta niun hende. P’esey mi kier a para un rato y recorda pueblo cu e persona cu a causa e daño grandi na pais Aruba hamas por ta parti di e solucion.
Vision Economico Financiero di pais Aruba di 2009 pa 2013
Na 2009 pueblo a duna Mike Eman nada menos cu 12 asiento pa goberna e pais aki. Esaki a ser logra a base di su tremendo campaña engañoso rond di BBO (cu ta algo normal unda cu mayoria pais ta bay pa impuesto indirecto) y tambe cu e wega cu ciere di e refineria cu na final a cera na 2010 y alabes a start pa un rato. Mike Eman a encontra Aruba cu debe cu tabata 43% di nos GDP, pues di cada florin 43 cen tabata bay na paga debe. Y tambe el a hereda den caha di pueblo nada menos cu di Plant Hotel 250 miyon y BBO di Valero 280 miyon, FDA 190 miyon, ganashi di Banco Central 10 miyon, entrada di BBO 200 miyon y cash 40 miyon pa un total di 970 miyon. Asina mes Mike Eman a bende na pueblo cu nos economia tabata tranca y cu financieramente nos tabata mal para. Anto e unico manera cu tabatin pa mehora esakinan ta door di sigui conseho di su consehero di oro sr. Richard Arends, unda cu mester a fia pa por a inverti pa por cuminsa draai economia di e pais. Y banda di esaki a bende na pueblo cu e vision berde unda cu esaki lo bira di dos pilar economico di e pais unda cu 1600 hende lo haya trabao pero a resulta un fracaso pa pueblo pero pa otronan el bira un manera di genera placa facil.
Vision Economico Financiero di pais Aruba di 2013-2017
Pa straño cu e por zona Mike Eman y AVP a bolbe gana eleccion 2013 y e biaha aki cu 13 asiento. Pueblo a honr’e pa un bon trabao cu mi persona te dia di awe no ta wak esaki. Mike Eman a sigui cu su maneho a base di sigui endeuda e pais unda cu su persona tabata orguyoso di esaki y tambe a percura pa proyectonan den pura di Hospital cu te dia di awe no por keda cla, Green Corridor y Watty Vos Boulevard cu pueblo por wak con mal traha esaki ta pero pueblo tin di paga 80.7 miyon florin pa mas di 20 aña. Na menos cu un aña despues e gobernacion aki na 2014, a haya un KB pa mal gobernacion riba tereno financiero unda cu nos presupuesto tabata tin un deficit di riba 400 miyon florin y nos debe tabata yegando 70% di nos GDP. 1 di augustus 2015 nos a conoce un CAFT cu lo mester a controla Mike Eman hunto cu Richard Arends di masacra pueblo pero a coopera cu nan unda cu na cambio di gobierno enbes di por a papia na 2018 di un surplus den presupuesto, nos a conoce caba na 2017 un deficit financiero di 155 miyon florin (3.1% deficit) y pa 2018 un deficit di 275 miyon (5.5% deficit) y nos debe na un 90% di nos GDP. Banda di esaki pueblo a keda mara na un acuerdo di Citgo cu tabata net contrario na su vision berde cu tambe a ser mal usa y unda fondonan di nos NV’snan y placa di pueblo a bay pa paga Wubbo Ockels den careda di 500.000 florin, contract miyonario cu Phillips pa cambia bombio, Al Gore alrededor di 500.000 pa papia un rato y tambe pa organisa Green Conference a saca di nos NV’snan den careda di 1.2 miyon florin sin conta ainda pago na Carbon War y Richard Branson cu te ainda no por aparece e pagonan haci pero cu si a cobra.
Bao nanishi di Mike Eman su consehero di oro tabata probecha
Mientras cu e maneho financiero tabata di fia y fia y crea debe cu orguyo pa pueblo paga , pasobra esey tabata palabra di Mike Eman y consehonan di Richard Arends cu tabata sigui e vision economico financiero di Paul Krugman. Pero locual Mike Eman no a bisa pueblo ta cu bao su nanishi y cu su consentimento Richard Arends tabata abusa di placa di pueblo y di NV’s nan, pasobra ta pueblo lo mester paga toch e debe crea. Richard Arends no tabata contento di tabata coordinador y cu nos por supone cu un salario di riba 20 mil forin pa luna pasobra nos no por saca esaki ya cu tin un ley cu ta protega e ciudadano di por haya su informacion di cuanto e ta cobra. Pero Richard Arends cu permiso di Mike Eman a cambia su contract pa uno di consultancy bao di e nomber Horizon Consultancy y cu Richard Arends como director. Den 27 luna el a strica 442.485 florin (un persona cu minimumloon tin di traha casi 21 aña pa yega e suma aki) y e no tabata feliz cu esaki pasobra el a drenta Utilities y a strica 574.060 (casi 28 aña un persona cu minimumloon tin di traha). Ainda e consehero aki no ta contento pasobra nos ta wardando riba resto di contestacion ta ken a organisa e Green Conference unda mas cu 1.2 miyon a ser saca di nos NV’snan y di papelnan cu a yega na nos ta bisa cu Richard Arends ta involucra den esaki tambe.
Probecha tambe den RDA
E super consehero di Mike Eman cu awor ta parlamentario tambe cu pueblo ta paga y cu den nos box a cay un biaha mas cu e consehero aki a strica tambe den RDA pa conseho y sigur banda di esaki tambe a cay papelnan unda cu Utilities tabata haci pago pa conseho pa reapertura di refineria y pa colmo un di e papelnan ta indica cu e ex minister aki den funcion lo a tuma pagonan riba su nomber. Mi persona no ta papia cu speculacion y ta p’esey preguntanan a bay na Promer Minister cu si ta berdad e ex consehero aki di oro, ex minister y actual parlamentario a cobra e sumanan aki y sigur si e sumanan paga door di Utilities na ken nan a bay. Pueblo tin e derecho di haya sa unda su placa a bay.
Pa termina, esaki ta pa pueblo realisa cu mientras Mike Eman ta pretende di ta e mihor lider di Aruba, e tabata percura pa yuda esnan rond di dje pa enriquece nan mes riba custia di pueblo. Y asina nos lo sigui informa pueblo ta con e ‘gran’ lider aki cu kier mira bo prosperidad cu el a laga na werki si a percura pa tur hende rond di su persona prospera. Pueblo keda pendiente. Manera e informacion ta den nos lo sali cu esaki y wak ken ta durf di hibami corte pasobra mi no ta traha riba speculacion pero mi ta traha cu prueba.
