San Barbola/Santa Cruz – Diahuebs anochi den careda di 8:30 p.m, patruya di Santa Cruz ta spot un Scrambler altura di Cashero.
E agentenan atento a mira algun iregularidad manera por ehempel ambos persona no tawata tin helm.
Momento cu nan a bay pa controla e brommer aki nan a sali bay, polis lo a dunanan manera ta ser bisa den ley un Stopteken pero nan no a sigui e ordo aki.
Poniendo nan bida na peliger nan core bay.
Asina a cuminsa un persecusion, cu segun e agentenan nan lo tawata tene un distancia di e brommer.
Normalmente polis no ta core tras di brommer, door cu e ta algo riscante y cu por termina fatal. Kiko a pone e agentenan sigui e brommer e biaha aki y te asina leu no ta mucho cla.
Den un bocht na San Barbola
Den un bocht na San Barbola e brommer ta perde control y ambos ocupante ta cay.
Un di nan mes ora a sali na careda direccion pabou, mientras e otro cu tawata cu slof a wordo deteni na e sitio.
E brommer mes tawata benta algun meter no mucho leu di unda polis a detene e ocupante cu a keda atras.
Mientrastanto otro unidadnan policial a sigui busca e otro cu a core bay.
Den algun minuut habitantenan atento a mira e homber aki scondi, den loke ta parse un rooi y nan a avisa polis.
Pueblo di Aruba a bira sumamente alerto y no ta confia nada, manera nan mira algo straño ta yama polis mesora. Diahuebs anochi tawata un caso asina, esta cu ta door di habitantenan atento cu a bisa polis unda e otro ocupante ta scondi nan a bin detene.
Polisnan a keda tira bista den e mondi unda e homber a bay sconde, pa si por haya algo cu elo por a benta of sconde.
Brommer y ambos homber a wordo hiba warda.
Na warda nan lo tin di bay splika e pakiko nan a core pa polis.