ORANJESTAD – Dia 25 y 26 di oktober lo tuma lugar na Republica Dominicana e conferencia “ Ales 2018, VIII Annual Convention caminda lo participa mas cu 300 compania di servicio di e region y actornan principal di Estados Unidos y Europa ademas di delegadonan di 17 pais di organisacionnan cu ta promove exportacion y inversion, Camaranan di Comercio y asociacionan di exportadornan.
Durante e programa di e conferencia lo tin presentacion- y reunionnan di negoshi. Na e conferencia lo atende e siguiente sectornan:
- Medical Tourism, 2.Spa and Wellness, 3. Cinema, 4. ICTs, 5. Apps (Video Games, Applications, etc.), 6. Professional Services (Engineers, Architects, Accountants, Advisors, Legal Services, Management Consulting), 7.Centers of Contact, 8.Fashion.
Minister Ruiz-Maduro ta promove y apoya nos comerciantenan local pa participa mirando cu esaki ta un oportunidad na unda cu no solamente nos negoshinan lo haya informacion y conocemento di e ultimo tendencianan den exportacion di servicio pero tambe lo tin posibilidad pa identifica oportunidadnan nobo di negoshi y inversion den e sectornan ya menciona. Como tambe comerciantenan local lo por haci uso di e ocasión pa hasi ‘networking’ cu lidernan mas principal riba nivel internacional. Tur esnan interesa pa participa lo mester registra prome cu 10 di october 2018, pa asina por aplica pa algun beneficionan cu ta wordo ofreci.
E mision pa “ALES 2018, VIII Annual Convention: How to develop high value-added service exports” ta parti di un di e proyectonan grandi di Exprodesk pa desaroya exportacion di sectornan di servicio cu yama: “Select and Build Capacity of Service Sectors in Aruba and Develop Strategies that Increase Export Opportunities and Establish Market Prospects”. Esaki ta un proyecto basa riba un estudio cu a saca afor e top 3 sectornan di servicio cu mas potencial pa exporta. A base di e estudio aki Exprodesk a organisa e “Business Week 2018: Conquering new Horizons”, unda nos negoshinan cu ta duna servicio a atende tayernan relevante pa ekipa nan mes cu conocemento con pa exporta nan servicio. Despues a sigui cu diferente reunionnan individual y coaching cu nos negoshinan. Nos comerciantenan a haya e oportunidad tambe pa duna nan contribucion na e projecto aki, cu a resulta den escogencia di e sector di servicio cu mas probabilidad pa exporta cu ta ‘Servicionan Profesional’.
Pa por ta bon prepara Exprodesk lo organisa un sesion informativo y tayernan pa asina e grupo di comerciantenan cu lo bay participa den e mision aki pa Republica Dominicana lo ta bon informa y prepara pa e reunionnan di negoshi. Por tuma contacto cu sra. Sharon Meijer via: [email protected] pa demas informacion y splicacion tocante e conferencia Ales 2018.
