Despues di un persecusion di mas di 7 ora, e barco di Marina Real Zr. Ms. Friesland cu cooperacion di Kustwacht Caribisch Gebied, ta intercepta boto carga cu mas di 900 kilo di cocaina.
Esaki a sosode e anochi di Diahues 20 di september den lama panort di Aruba. E tripulante a keda deteni y e contrabanda confisca, nan a wordo entrega na US Coast Guard. NO por a duna informacion di e caso aki anteriormente, pa motibo cu e caso aki tabata bou investigacion y den interes di e caso, pa no perhudica e investigacion.
Durante cu e helicopter di e barco di Marina Real Zr. Ms. Friesland tabata patruyando, nan a nota un GO Fast bayendo cu velocidad halto, abordo di e Go Fast aki, nan a mira un gran cantidad di paketenan sospechoso.
E barco Friesland y e helicopter mesora a cuminsa persigui e boto y a trata na para e boto sospechoso aki. E avion Dash-8 di Kustwacht tambe a drenta den e accion pa asisti Marina Real den e persecusion aki.
Varios señal y tiro di advertencia a wordo lansa for di e helicopter pa e boto para, pero no tabata tin niun efecto riba e tripulante di e GO Fast, cu velocidad halto nan tabata sigui bay.
E FRISC, un di e botonan mas liher di Marina Real cu tin ariba e Barco Zr. MS. Friesland, tambe a drenta den accion. E FRISC ta wordo usa ora mester intercepta otro boto. Friesland.
Na momento cu e helicopter y e FRISC tabata acercando e Go Fast, e tripulante a cuminsa na tira e paketenan den lama. Mesora esakinan tabata wordo saca for di lama door di e boto FRISC. Mientrastanto e helicopter tabata sigui e GO Fast.
For di e helicopter a lansa candela riba dos di e tres motornan di e GO Fast, asina a kibra e velocidad halto di e Go Fast. Despues for di e FRISC a logra paga e ultimo motor y no a keda e tripulante di e GO Fast nada, cu entrega nan mes na autoridad. E cuater miembronan di tripulante a wordo deteni y entrega na autoridad.
En total den e accion aki a keda 900 kilo di cocaina intercepta.
Segun e Commandante di Marina den e area di Caribe, (CZMCARIB) e barco Zr. Ms. Friesland na e momentonan aki ta ehecutando operacionnan anti droga den mar Caribe. E barco y su tripulante ta forma parti di un operacion permanente y multinacional di combati droga, e operacion aki ta bou guia di Joint Interagency Task Force South. E barco ta operando den un taskgroup, den cual CZMCARIB ta hiba e comando. Operacionnan anti droga ta un di e funcionnan mas principal di defensa hulandes den Caribe.