Dialuna atardi a tuma lugar conhuntamente cu gobierno di Aruba, AAA N.V. y e lendersnan, e “Official Financial Closing” pa e proyecto gateway 2030. Manera ya ta conoci caba AAA ta bai conoce un reconstruccion y expansion pa asina por maneha e fluho creciente di pasahero y facilita nan experiencia di biahe y na mesun momento opera na un manera mas efectivo y sostenibel. Tambe e proyecto “Gateway 2030” tin como meta pa expande nos aeropuerto den futuro pa asina por acomoda mas avionnan commercial.
“E ultimo renobacion di aeropuerto tabata e proyecto “Beatrix 2000” cu a cuminsa den añanan 90. Awor mas cu 20 aña despues nos lo ta formando parti di un di e renobacionnan mas grandi den Historia di Aruba.”
Intencion di e proyecto ta pa transforma nos aeropuerto actual den e mihor den Caribe. E proyecto aki sigur lo aporta na nos economia local y tambe yuda na engrandece nos Turismo cu ta e unico pilar economico di nos pais Aruba cu ta genera casi 90% di nos entrada bruto nacional.
E proyecto Gateway 2030 lo ta un inversion di $275 miyon. E lo bai crea mas cu 400 cupo di trabou pa nos hendenan. E lo bai stimula nos economia, contribui na nos GDP y contribui na finanzas di gobierno di Aruba. Tempo di construccion lo tin un periodo di 5 aña.
Minister Dangui Oduber ta compromete su mes sigur cu nos Turismo pa sigi fortalece esaki den uno solido. Den nomber di Gobierno di Aruba, Minister Dangui Oduber ta felicita Aruba Airport Authority N.V. y Aruba en general cu inicio di e proyecto Gateway 2030.