Willemstad, Corsou: Diabierna den oranan trempan di mainta, e avion di patruya Dash di Kustwacht a señala un boto tipo ‘Yola’den awanan teritorial di Corsou.
Mesora esnan abordo di e Dash a tuma contacto cu Rescue & Coordination Center (RCC), esaki a pone cu RCC a saca un team cu nan boto Metal Shark pa intercepta e boto aki.
Nan a logra intercepta e boto aki un 6.5 miya pazuid di Klein Curacao.
Abordo di e boto nan a topa cu tres persona y tambe cu un cantidad di paki y otro obhetonan, entre otro un makako.
E personanan y e boto a wordo hiba na e pier di Kustwacht na Parera.
Despues cu Kustwacht a caba di atende cu e personanan aki, kuswacht a hiba tur loke nan a haya riba e boto, e makako y e tres sospechosona aki na Warda di Polis y a entreganan den man di autoridad pa mas investigacion.
Den e boto tabata tin mas o menos 148.35 Kilo di cocaina y 6.805 kilo di marihuana tambe un cantidad grandi di arma.
E caso aki ta den man di autoridad di Corsou pa mas investigacion.
source: Kustwacht Caribisch Gebied