Eagle/Ex Bushiri Hotel: Diadomingo 9 di september, auto a dal un homber Venezolano na momento cu ela baha for di bus y a crusa caminda. E homber aki a keda seriamente herida, ela ricibi hopi golpi, aparentemente elo a fractura su pia y brasa, tambe ela ricibi golpi na cabes y elo a haya hopi sla paden.
Homber den hospital sin seguro medico, mientras tur luna ta deduci for di su salario pa seguro
E homber aki ta drumi ainda den hospital y no por haci e operacionnan necesario pa su salud, paso su papelnan no ta na ordo, aparentemente e no tin AZV, pero si tin dos aña ta traha na un bar na Eagle Beach y segun nos a compronde cu e gerente tur luna lo ta kita for di su salario tur sociale lasten, dus su loonbelasting, AZV, SVB etc. etc. pero nunca e placa aki lo a yega na e departamentonan concerni.
Dos aña trahando y doño di trabou ta nenga di conoce su trahador
Segun nos a compronde cu aparentemente e doño lo a bise cu nan lo fix su papelnan pe, pero tambe nada a wordo haci. E mas tristo ta cu e doño di trabou awo ta nenga di conoce e homber aki. E homber aki actualmente ta ilegal interna den hospital sin por haci e operacionnan necesario. Un familiar cu ta na Aruba ta bishit’e y ta yud’e.
Doño di bar no ta mantene su mes na loke ta stipula pa ley
Informacion cu nos a ricibi ta cu e bar aki no ta paga overtime, no sa kiko ta 150% of 200%, parce cu trahadornan ta traha for di 5’or di mainta te 9’or di anochi y e doño no ta mantene su mes na 8 ora pa dia, aparentemente nan no lo ta mantene nan mes na nada cu ta stipula pa ley. Segun nos a compronde un di e doñonan ta un dama local, cu sigur lo mester por sa cu cada trahador tin nan obligacion y nan derecho y cu cada doño di trabou tin su obligacion di cumpli cu ley.
Aparentemente cu ora nan kier kita un persona for di trabou nan ta tilda nan pa ladron y ta kita nan for di trabou, nunca ta bay polis y asina ta keda cu e vakantiedagennan di e empleadonan.
Tin mas trahador stranhero cu lo ta wordo mal trata pero tin miedo pa represaya
Segun nos a haya informacion cu e homber interna na hospital dia su mama a fayece e kier a bay entiero, creyendo cu tur su cos nan ta na ordo. Pa su sorpresa ela wordo informa cu e no por bay Venezuela, paso su papelnan ta den tramite, cual tabata un mentira. Tin mas trahador Venezolano trahando na e bar aki, cu ta pasando den e mesun situacion, e gerente di e bar ta haciendo mescos cu nan, pero nan tin miedo di papia pa e gerente no tuma represaya.
Na e bar aki no tin local ta traha, paso e gerente sa bon, cu hendenan local sa nan derechonan, pero un persona manera e homber Venezolano aki riba 50 aña no ta na altura di su derechonan. E necesidad di placa pa mantene su famia ta pone cu e ta acepta loke e haya y con nan trat’e paso e y su famia mester biba.
Control regularmente mester bin den area turistico pa combati cheap labor
Esaki ta e tiponan di cheap labor cu mester caba, mester cuminsa cu un control estricto y regularmente den area turistico, manera bar, restaurant, hotel, y tambe companianan di catering. Pa asina evita cu e doñonan di trabou por sigui probecha di e situacion cu e Venezolanonan cu ta yega Aruba ta pasando aden y ta abusa di nan, y door di e cheap labor ta hacie dificil pa un local haya trabou y wordo paga manera debe ser.
Un otro area cu salubridad mester tene control ta companianan cu ta Cater cuminda, esta control ariba e carchi berde. Esaki pa descarta tur posibilidad cu por tin hende trahando cu cuminda y sin e carchi berde.