Parlamentario Endy Croes a reacciona riba un conferencia di prensa teni diahuebs mainta pa Mike Eman kende a resucita despues cu el a gaña di muri. Mike Eman a gara na un rapport cu Banco Central a publica Business Perception Survey di e di dos kwartaal di 2018.
Mike Eman a yama un rueda di prensa pa zwaai cu e rapport aki pa asina haci un politica di populista pa purba bini bek na poder. Mesun Mike Eman aki a gaña henter e pueblo cu e lo elimina BBO na 2009 cual tabata 3% e tempo aya.
Puntra bo mes pueblo na 2017 ora Mike a wordo cori di gobernacion cuanto el a laga esaki? Na 2017 esaki tabata na 3.5% pues Mike a gaña e pueblo aki. Mesun Mike Eman ta culpabel mayor cu a aumenta e debe di pais Aruba di 41.7% pa 90% den 2017.
Esta di cada florin cu drenta caha di gobierno 90 cen ta comprometi pa paga debe. Esaki ta e maneho di e “real” Mike Eman. Den 2018 gobierno mester paga 219 MIYON florin solamente na interes riba placa cu Mike Eman a presta. Esaki ta e maneho cu Mike Eman a hiba ultimo 8 añanan unda el a crea e desaster financiero y e Mega Debe.
Tur esakinan tambe ta para den rapportnan anterior di Banco Central. Mira crecemento economico 2015 den mesun rapport di Banco Central bou Mike Eman y AVP tabata -0.5%, pues no tabata tin crecemento y si mira den mesun rapport di Banco Central e Statistical Digest ta duna cu e crecemento economico den aña 2016 tabata -0.2 %. Pues dos aña “back to back” no tabata tin crecemento economico y pues economia tabata stagna cu e maneho di Mike Eman y su fantasianan pa Aruba.
Un cos Mike Eman a logra si ta redobla e debe nacional y crea e Mega Debe. Nos no por lubida e KB cu Mike a haya pa e mesun mal maneho financiero.
Nos no por lubida Mike su expresion den parlamento cu Aruba lo sigui bay djis un tiki mas den rood. Tampoco e verbio di Mike Eman cu e ta orguyoso di e debe y e debe t’ey pa nos tur bay pag’e.
Rapport recien di Hulanda ta indica cu na 2039 nos lo yega bek na 50% di debe nacional. Pues Mike Eman awe pafor di parlamento kier instiga y hunga politica barata. Dieptriest.