Ayera mainta lider di partido AVP, mr Mike Eman, a informa pueblo di Aruba di e rapport emiti recientemente pa Banco Central cu ta e “Business Perception Survey, Result for the 2nd quarter 2018” y cu ta motibo di preocupacion hopi grandi mes.
Den un lapso di tempo asina cortico, gobierno actual di coalicion a transforma un economia stabiel cu tabatin na 2017, pa un economia cu ta pasando den momentonan dificil y hopi insigur pa falta di un maneho adecuado of miho bisa, un vision di un gobierno cu no tin vision pa maneha e pais aki, lider di AVP a mustra.
“E situacion economico analisa na Banco Central, no solamente ta refleha den e “downturn”, pero tambe ta mira e cambio di mas dramatico. E indice di e condicion economico a termino corto ta bayendo abou. Cifranan cu ta demostra cu despues cu na 2017 tabatin un economia stabiel, basa riba indicadornan, cu crecemento y speransa den futuro di e pais, esaki a bolter den 2018. No solamente esaki a reduci cu algun porcentahe pero a cay na e resultado comun cu Aruba tabatin henter e periodo di 2016 y 2017.
Den e prome aña di nos gobernacion, Gobierno a traha pa inverti pa e pais por a recupera y den e di dos periodo di nos gobernacion a enfoca riba corta gasto unda cu por, pero no aplica paketenan di medida, pa sigura stabilidad di e economia di e pais y poder di compra di ciudadanonan.
Awe pueblo ta mira e efectonan di e gobernacion cu tin awe, esta un caida dramatico di casi 50% den locual BCA ta registra bou di “short term future economic condition index” cual a bay abou. Esaki ta refleha den cada un di e otro indicadornan cu BCA ta presenta den su encuesta haci.
Nos por a anticipa esaki ora cu a bin cu redoblacion di BBO, pero e cifranan aki ta solamente e di dos kwartaal di 2018 y esaki ta unicamente anticipacion di loke ta e consecuencianan di e redoblamento di BBO den lunanan nos dilanti.
Unicamente e panico, e ansha e redoblamento lo causa, a trece e caida di 10% den e poder di compra y bentananan registra y esaki ta nifica cu e di tres y cuater kwartaal mester wanta curason di loke lo bay ta e resultado,”sr Eman a trece dilanti.
Pa loke ta benta, y su caida, BCA ta mustra cu den e kwartaal bou di revision, e porcentahe di e contestanan indicando un caida den benta a aumenta di 16%, den e prome kwartaal, pa 25% den e di dos kwartaal di 2018. Simplemente cu cambio di gobernacion, cu no a presenta un vision, por a mira den e prome kwartaal un caida di 16% den benta y despues a yega te na un caida di 25% cu ta indica caba kico por spera e lunanan na caminda e lider di AVP a sigui mustra.
“Esaki no ta cifranan cu BCA a pensa riba su mes, of cu nos no ta reconoce den nos bida diario ya cu unda cu nos yega, por scucha ciudadanonan papia di perdida di poder di compra y ta tende comerciantenan papia di perdida di benta. Esaki ta refleha tambe awe di e Gobierno aki cu Aruba tin casi un aña despues di eleccion di 22 di september,” sr Eman a splica.