Den e dianan cu a pasa Minister Lampe a wordo aserca pa varios docente y ex-alumnonan di Colegio Frere Bonifacius pa wordo felicita, pa tin e curashi di tuma e decision, pa trece Colegio Frere Bonifacio bek, na su luga di origen.
Un decision asina, no ta facil, mirando e situacion financiero cu e pais Aruba ta actualmente y despues di 6 aña di abandono, e infrastuctura di e scol a bay hopi atras.
Minister Lampe den su capacidad di Minister di Enseñansa a pidi DOW su cooperacion, pa traha un rapport di e situacion real di e edificionan riba tereno di Colegio Frere Bonifacius na Indianenweg.
Den e rapport DOW ta remarca cu ya na aña 2004, nan a haci un prome inspeccion y ya di e tempo ey a constata scheurnan den e murayanan ocaciona pa e fundeshi cu tawata sak. Tambe a bin constata cu awa di yobida, no por keda hopi riba e suelo pasobra e tera bow di e fundeshi ta satura hopi lihe y cu consecuencia e capacidad di carga di e tera ta empeora.
Den un segundo inspeccion na final di december 2008 a bin constata cu e cantidad di scheurnan a aumenta y esaki ta consecuencia cu e fundeshi a bira instabiel pa motibo di e sakmento. Na 2012 e scol a muda, pa motibo di aumento di e sakmento y a bin daño den e beton na e edificio mes. Fuera di esey tawata tin diferente plannan pa cu e scol, cu nunca a wordo concretisa.
Ultimo DOW a haci algun anotacion cu por a constata na e scol;
- E edificio a wordo invadi y sakea
- E edificio a sufri daño di candela parcialmente
- E scheurnan y sakmento di e pisonan a bira pio
- Pa motibo di corosion e betonnengoot y ringbalknan a wordo exponi y a crea mas scheur
- Tin comehein na cierto local y baño
- No tin bon afloop di awa di yobida cu consecuencia cu e fundesshi ta sigui empeora
A base di e ultimo anotacionan ya menciona, DOW a duna como conseho pa declara e edificio di scol completo como uno peligroso cu posibilidad di derumbe y cu mester wordo demoli. Tambe DOW a conseha pa haci un estudio di e tereno y su subsuelo.
Despues di haya aprobacion di bisdom Wiilemstad y a base di e consehonan di DOW, Minister Lampe conhuntamente cu su colega Minister di Infrastuctura sr. Otmar Oduber a tuma e decision di laga demoli e edificionan y haci su esfuerso, pa trece e scol bek, na Indianenweg.
E idea ta pa construi e scol, a base di e concepto di un “smartschool” y pa esaki Minister Lampe a involucra e expertonan di TNO. Un smartschool ta algo innovativo y cu ta concorda cu ideanan di modernisa nos enseñansa. Nos tin cu cuminsa di aprobecha di tur e desaroyonan cu ta existi den e área di sostenibilidad y aplik’e tambe cerca nos mes y no tin un miho luga pa haci esaki, cu na nos scolnan cu ta creando e fundeshi di nos futuro.
Minister Lampe ta agradeci pa e cooperacion ricibi di tur esnan envolvi, cu ta mucho hopi pa menciona, pero sigur un danki na staff y personal di e scol mes, cu despues di 6 aña di abandono y carga pasenshi porfin ta haya speransa cu e cambio ta na caminda.