ORANJESTAD – Parlamentario Sue-Ann Ras (MEP) diaranson durante un conferencia di prensa a haci un apelacion riba minister di enseñansa Rudy Lampe, pa haci un investigacion relaciona cu e cosnan ‘straño’ cu ta pasando na EPB. Entre nan e dak di e edificio na Hato ta casi cay den otro, no tin material manera buki (ainda ta haya copia), material pa cushina y asina tin mas cos ta pasando. Ras a mustra su preocupacion grandi tambe, pa e parti di alumnonan di 6e klas cu ta sigui pa EPB.
E DATONAN
Ras a comparti e datonan importante, pa ilustra su punto, ora cu a papia di e alumnonan di 6e klas cu ta pasa pa EPB. A mustra cu segun relato anual di Departamento di Enseñansa di 2015/2016, tabatin un total di 244 mucha cu tabata bay EPB na 2016-2017. A mustra cu EPB no ta un mal escogencia, pero si loke ta preocupa Ras ta, con e 244 alumnonan ta reparti den e tres nivelnan di EPB.
EPB tin 3 nivel y cada nivel tin duracion di 4 aña:
- Nivel 1, conoci como ‘doorstroom’, unda e alumnonan por sigui EPI nivel 3 despues.
- Nivel 2, conoci como ‘uitstroom’, cu ta encera mas practica cu teoria.
- Y bo tin Nivel 3, conoci como mercado di labor (arbeidsmarkt). Aki ta unda cu Ras ta preocupa, mirando cu e aña aki, e nivel 3 a produci un total di 13 klas. Esaki kiermen cu mayoria mucha, cu ta caba e klas 6 y ta bay EPB, ta bay den e Nivel 3.
TEST DI EPB
Ras a haya acceso na e testnan cu e alumnonan di scol basico klas 6 ta rekeri pa traha pa por defini cua nivel e ta drenta ora e bay EPB. Aunke esun cu el a haya ta mas bieu, di 2014-2015, pero e linea ta keda mescos tur aña. Segun e parlamentario, a mustra cu ta haya ‘reken y tekst toets’, unda cu tin e parti di idioma, y traha som. Segun Ras, mester para keto un rato, pa wak kico ta bayendo robes, cu tanto alumno ta bayendo den nivel 3 di EPB. “No por ta, cu nos ta logra cera 2 klas so di nivel 1 y 2 klas di nivel 2 na EPB Hato y San Nicolas. EPB San Nicolas tin 6 klas di nivel 3 y EPB Hato tin 7 klas di nivel 3 tambe”, Ras ta bisa. E parti mas alarmante segun e parlamentario ta e muchanan di 17, 18 y 19 aña. E momento cu nan caba nivel 3 (esunnan cu ta logra caba, pasobra di 10 alumno, 4 no ta logra caba nan scol secundario), nan no tin niun opcion di estudio den dia mas, sino drenta mercado laboral di biaha. “Nan no ta completamente prepara pa mercado laboral y nan ta hopi jong ainda, pasobra e lesnan no ta manera e tipo di lesnan tempo di John F Kennedy (School), no tin ni material adecua y disponibel pa e hobennan haci practica”, Ras a bisa.
Pa motibo di nan edad 18-19, nan no tin e oportunidad di sigui pa nivel 1 of 2 y ta forza nan pa sali for di scol. “Eynan mi ta puntra mi mes, dicon tur e añanan atras, nos no por a wak e problematica aki y drecha of mehora esaki? Con atractivo EPB nivel 3 ta pa mercado laboral y pa nos hobennan? Dicon nos no por a bin cu e iniciativa pa duna nan e opcion, pa sigui den Nivel 2 of traha un otro EPB, por ehempel atardi of anochi? Of haci e nivel 3 mas largo, pues hacie 5 aña y asina aprecia nan habilidadnan? Nos ta bringando contra un sistema hopi rigido y inhusto den enseñansa”, Ras a finalisa bisando.