ORANJESTAD — Diabierna ultimo Universidad di Aruba a efectua apertura di aña academico 2018/2019. Mes momento a celebra e hecho cu Universidad di Aruba ta existi 30 aña. E facultad di derecho a cumpli 30 aña y e facultad di economia a cumpli 25 aña.
E aña aki Universidad tin 656 studiante, di cual 2/3 parti ta hende muher.
Den e 30 añanan aki ta hopi studiante a gradua na Universidad di Aruba y den bida di centenares di persona, Universidad tabata e trampolin pa exito profesional. Pa esaki mi ta felicita y gradici Universidad di Aruba.
Den vision di Gobierno Universidad di Aruba ta hunga un papel importante. Mester traha riba e diferente retonan cu Universidad ta atravesando, entre otro espacio. Mirando e popularidad di nos Universidad na Aruba y internacionalmente, Universidad a crece y ya caba ta haciendo uzo di edificionan aleha di e edificio principal. Universidad a indica di lo kier yega na un areglo cu obispado pa haya partinan di e edificionan den cercania.
FACULTAD NOBO: SISSTEM
Innovacion tin un prioridad halto den vision di Gabinete Wever-Croes, tambe riba e tereno di enseñansa pa prepara Aruba pa e economia di futuro. Aruba mester cuminsa prepara suficiente profesionalnan riba e tereno tecnico y tecnologico STEM.
Nos Gobierno ta duna prioridad na sigura cu tur studiante tin acceso na oportunidadnan di estudio di calidad halto den materianan STEM (science, technology, engineering, math).
Esaki lo duna Aruba e posibilidad pa realmente ta competitivo den nos region den futuro. Sino nos ta keda depende di profesionalnan di otro pais. P’esey nos Gobierno ta trahando na un facultad nobo na Universidad: SisSTEM, cu lo bira realidad pronto.
“Pa mi esaki tin un atencion special pasobra mundialmente no tin hopi mucha muher cu ta studia ciencia y tecnologia. Como mayornan nos mester stimula nos yiunan pa studia esaki pasobra ta e habilidadnan aki lo prepara nan pa futuro. Na nos Universidad tin 2/3 parti hende muher y incluyendo SisSTEM den nos Universidad, mi ta spera cu nos por haya mas hende muher tambe specialisa den materianan STEM”, premier Evelyn Wever-Croes a duna di conose.
Cu e faciltad nobo aki ta consolida e posicion di Universidad di Aruba y segura su existencia pa hopi aña ainda. Pabien Universidad y hopi exito na tur studiante den e aña academico 2018/2019.