Un hoben poderoso ta un ser defini pa un ciudadano di un edad relativamente hoben cu ta activo riba un tereno specifico den nos comunidad. Un hoben poderoso ta e hoben cu ta dedica su tempo liber na yuda y mehora un otro persona, un grupo di mucha, hoben of adulto of e por ta un hoben cu tabata den un situacion dificil y a supera di esaki na un forma positivo.
Awe 19 di september 2018 cu hopi enthousiasmo ATHA conhuntamente cu e comicion di Poder di Hubentud ta HABRI INSCRIPCION pa e di 4 edicion. Poder di Hubentud ta un proyecto cu desde 2015 a demostra di ta brinda e hobennan di Aruba un empuhe pa sigui haci e bon trabou cu nan ta haci den nos comunidad. Poder di Hubentud ta enfoca pa pone e hoben cu ta haci trabounan positivo den e lus di dia. ATHA ta enfoca riba y crea bon noticia rond di e hobennan aki, pasobra nan lo ta lidernan ehemplar di mayan.
Mayorornan, famia, meastro, lider, coach, amigo, amiga, of persona conoci por yena un aplicacion pa e hoben cu ta haci e diferencia sea ta den trabao social, cultural, deportivo, boluntario, mehorando su propio desaroyo of como entrepreneur, den media, den arte y musica. ATHA ta conta un bes mas cu e sosten di mayornan, amigonan, maestronan, lidernan y e hobennan di edicionnan di Poder di Hubentud anterior pa sondea y manda hobennan potencial cu a sobre sali y como “rolemodel” y cu merece di haya un reconocimento.
E hoben aki lo tin e oportunidad pa bai den un trayecto di algun curso, pa forma su capacidad di lider y caminda na final lo saca e ganadornan di e proyecto. Na final lo tin 2 ganador, 1 den categoria hoben di 12 – 17 aña y 1 den categoria hoben adulto di 18 – 24 aña.
Bo conoce un hoben ehemplar y cu ta destaca, e ta un hoben poderoso? Nomin’e pa Poder di Hubentud 2018. Na caminda pa di 5 EDICION.
Pa inscribi un hoben, por yena e formulario cu tin riba e facebook di of na oficina di ATHA na Caya Appeldam 2 na Dakota. Pa mas informacion por tuma contacto cu Nicholle Vrolijk 5823773 of [email protected]