Mexico City: Diabierna den careda di 10’or di anochi, 5 sicario bisti cu trahe tradicional di mariachi, ta likida 5 persona y ta herida 8 persona riba Plaza Garibaldi, na e capital di Mexico.
Plaza Garibaldi ta un plaza hopi bishita pa turista y tambe localnan. Na momento di e tiramento e restaurantnan tabata yen y tabata tin varios grupo di mariachi dunando serenata, na diferente localidad y na personanan presente riba e plaza. Manera ta custumber un diabierna anochi basta druk.
E sicarionan a yega riba scooter bisti mane un grupo di mariachi, y pa sorpresa di tur esnan presente, e grupo di mariachi aki no a bin pa toca, ni pa duna serenata, nan a yega y a los varios tiro, cu consecuencianan fatal. Despues di a likida 5 persona, 3 homber y dos muher y lagando 8 persona mas herida, e sicarionan a bandona e sitio riba nan scooter.
Mientras tanto autoridad di Mexico City a detene dos persona como sospechoso. E motibo di e tiramento aki den cual 5 persona a perde nan bida y 8 persona a keda herida, no ta conoci ainda pa autoridad. Entre medianan local tin speculacion cu lo por ta trata di reglamento di cuenta di gang of di droga.
Autoridad local a detene dos persona como sospechoso y ta interogando nan, e caso aki ta bou investigacion y no ta descarta e posibilidad cu pronto mas detencion lo por cay.