Mayan tin Apertura di Aña Parlamentario Nobo. Pa motibo cu presencia di Minister Xiomara Ruiz-Maduro, como Minister di Finansa ta rekeri na e tratamento di e evaluacion di Aruba door di e Foro Global pa transparencia fiscal y intercambio di informacion na OECD na Paris, e Minister no por ta presente pa e acto solemne y importante na Parlamento pa e aña Parlamentario nobo.
Minister Ruiz-Maduro: “Mi ta disculpa pa mi ausencia. Na ningun momento ta mi intencion pa falta respet cu mi ausencia, pero e responsabilidad cu pueblo a confia mi cu n’e ta pone cu tin biaha mi mester defende mi pais den foronan internacional pa por evita consecuencia negativo. Di tur manera, den mente y curason lo mi tin mi pais Aruba presente y mi ta pidi Dios drama Su bendicion rib’e gobernacion cu mi tin honor di forma parti di dje pa nos por traha semper na bienestar di nos Pueblo”.
Minister Xiomara Ruiz-Maduro ta invita pueblo di Aruba pa sigui e reunion solemne aki na unda cu Gobernador lo hiba palabra y splica kico por wordo spera pa gobernacion den e aña nos dilanti.