ORANJESTAD – Manera ta conoci, e ley di ‘Kinderopvang’ a drenta na vigor dia 1 di juli 2018. Segun Parlamentario Sue-Ann Ras (MEP), si bay bek den historia, ta for di 1996 Aruba tabata purba di bin cu e Ley di ‘Kinderopvang’ y a dura masha hopi mes pa yega na e resultado. “Mi ta lamenta cu mi a manda varios pregunta na Minister Lampe for di 12 di maart 2018 y bolbe manda e preguntanan dia 30 di juli y pidi atencion pa haya contesta”, Ras a bisa.
E PREOCUPACION
E preocupacion ta keda riba e aspecto di calidad den e crèchenan segun Ras. E exigencianan di cuido, maneho y calidad ta di sumo importancia, mirando cu educacion y e precondicionnan, manera siguridad, nivel di leiders y infrastructura di vivienda, mester ta e base fundamental pa un mucha di 0 pa 4 aña. “For di un investigacion haci pa Rosalin Kock, pa su masteropleiding, el a indica cu 95% di nos muchanan di 0 – 4 aña ta keda 5 dia pa siman na un crèche”, Ras a sigui splica. Esey kiermen cu pa mas di 8 ora, un cantidad grandi di nos muchanan ta pasa na un crèche y esaki ta nifica tambe cu e muchanan mester haya hopi cuido, guia y educacion. “Y awo cu e ley a drenta na vigor, nos mester tin tur aspecto delinea, pa por scoge y aplica cierto maneho nacional pa garantisa cu e crèchenan ta riba nivel”, Ras a sigui bisa.
PREGUNTANAN NA MINISTER
Di tur guia cu tin den e crèchenan, 1/3 parti di nan no tin un ‘beroepsopleiding’ y 1/3 tin un nivel di LBO y ta papiando di un promedio di 300 guia na alrededor di 110 crèche na Aruba. Riba esaki, e parlamentario a haci e mandatario algun pregunta dia 12 di maart ultimo:
- Kico ta e plan di accion pa e 4 lunanan aki pa realmente e ley drenta na vigor?
- A reuni cu e instancianan concerni pa asina haya nan input y tambe sugerencia pa implementacion di e ley aki bay na un bon forma y structura?
- Minister a pensa riba un posibel plan di subsidio?
- Kico ta e motibo principal cu kinderopvang ta cay bou di Ministerio di enseñanza y no bao di Ministerio di salud, ya cu ta trata mas di cuido y no di curiculo? Esaki specialmente mirando cu ya tin un team den IVA (Inspectie Volksgezondheid) cu ta haci e control riba e casnan di cuido.
- Lo tin un open register y/of vergunning? Y kico ta e diferencia exacto, mirando cu ambos lo costa placa pa e persona interesa y esaki por crea barera pa nan bin registra/pidi permiso.
- Lo tin un curiculo desaroya cu e metanan final y si a sinta caba cu e cuerpo di docente/cabesante di scol preparatorio pa inventarisa esaki?
Y dia 30 di juli Ras a agrega e 2 preguntanan aki:
- Kico ta e status actual di henter e proceso aki, referiendo na pregunta 1 te cu 6?
- Ki dia Parlamento lo por haya un presentacion tocante maneho di Minister riba e asunto aki?
“Mi ta spera cu pronto nos por haya un presentacion den comision di enseñansa tocante e maneho di crèche, ya cu e crèchenan clandestino ta creciente y tur hende por habri un crèche, hasta esunnan cu tin un ‘strafblad’ y no tin niun tipo di control”, Ras a sigui bisa. E ta mustra cu mirando cu e ley nobo aki a drenta na vigor, unabes cu un persona dicidi pa habri un crèche, e mester haci un peticion pa un permiso y esaki mester ta mara na un cantidad di exigencia y mas cu claro, cu si tin un cierto ‘strafblad’ pa fraude, zeden- of levendelict, e persona ey no por ni habri of traha na un crèche.
“E exigencianan ta varia den detaye y tin incluso hasta un multa di Awg. 25 mil florin si viola e exigencianan. P’esey mes ta importante pa henter e manual di maneho di exigencia di calidad como tambe e ley, ta presenta na veld, pa nan por ta na altura di esaki”, Ras a finalisa bisando.