Malmok: Diaranson algo prome cu 11’or di mainta, a sosode un accident serio, entre un UTV y un V car Van di marca Dodge, esaki a sosode riba e caminda pazuid di e bocht di Malmok.
Mesora a manda varios unidad di polis y ambulance na e sitio, na yegada enberdad nan ta topa cu un accident hopi serio entre un UTV y un V car Van.
Den e UTV tabata tin un mucha, kende den e impacto fuerte su pia drechi a wordo amputa, un dama tambe a keda herida cu rascanan grandi na su schouder y na un parti di su pecho.
Na momento cu personal di ambulance tabata preparando e mucha y e dama pa transportanan pa hospital. Polisnan na e sitio mesora a busca un ice jug y ijs pa pone e pia den dje y hibe hospital, pa asina trata na scapa e pia.
E victimanan a wordo transporta cu hopi urgencia pa hospital, polis a cera tur crusada y rotondo pa asina e caminda a keda liber pa e ambulancenan por a yega hopi liher hospital.
Departamento Tecnico di polis y specialista di trafico, a wordo pidi na e sitio. Alto Comisario Ho tambe a presenta na e sitio.
Presencia di slachtofferhulp a wordo pidi na hospital pa asisti e famia den e momentonan dificil aki.