ORANJESTAD, Aruba – 15 di Augustus 2018: Pa por haya sa si Aruba tabatin un crecemento of caida den cifra di turismo, Aruba Hotel and Toursim Association (AHATA) ta ricibi for di hotelnan miembro un rapport mensual di nan cifranan.
Na luna di Juli 2018 e ocupacion di hotel tabata 87.3% locual ta un tiki mas halto cu di Juni 2018. Esaki ta un patronchi normal cu den lunanan di Juli y Augustus, e ocupacion ta mas halto compara cu Mei y Juni. Sinembargo Juli 2018 tabata 0.9 punto mas abou cu Juli 2017. Apesar cu tabatin menos turista kedando na hotel den Juli e aña aki, e hotelnan a logra cobra un ADR (average daily rate) mas halto y e resultado ta RevPAR (revenue per available room) di $213.05 cu tabata 11.8% mas halto cu e mesun luna na 2017.
E motibo cu tabata posibel pa cobra mas pa camber e prome 7 lunanan di 2018 ta pasobra e horcannan di September 2017 a causa cu hopi hotel den region Caribe a cera nan portanan. E hotelnan na e islanan cu a sufri daño ta renobando nan propiedad y ta cuminsando di habri bek. Tanten cu tin menos inventario di camber den e region, Aruba por cobra mas y mira e crecemento den RevPAR. Proyeccion ta cu pa mita di 2019 mayoria di e hotelnan den region lo habri bek cu propiedad completamente nobo. E entrada di hotelnan ta importante, pasobra e impuesto (room tax) cu turista ta paga pa cada anochi na e hotelnan ta bay pa Aruba Tourism Authority (ATA). E fondonan aki ta uza pa haci mercadeo y atrae mas turista pa Aruba.
A funda Aruba Hotel and Tourism Association (AHATA) na 1965 pa representa e sector di turismo di Aruba. AHATA ta representa na mes momento 100 miembro cu ta companianan dunando servicio den turismo y ta emplea un gran parti di empleadonan riba nos isla. Su miembresia ta varia for di hotelnan, timeshare, operadornan di tours y watersports, y mas companianan grandi y chikito den e sector. E rol primordial di AHATA ta pa influencia exito sostenibel pa e industria turistico di Aruba.
FIN