Oranjestad: Na momento cu gobierno actual a keda instala, Gobierno di Aruba a declara cu na Aruba tin un Crisis Social, especialmente door di e sucedido lamentable na November ultimo, locual a sosode cu e dos angelitonan Rishandroh y Eugene. E crisis social no a bira menos y Gobierno actual ta trahando duro pa atende cu e problemanan social, pa Alivia y mehora e problemanan social.
Segun Minister Glenbert Croes, casonan manera loke a pasa Diadomingo ultimo ta bisa bon cla cu “ nos por ta trahando duro, pero loke nos ta haciendo no ta suficiente’. Minister a sigui bisa cu kisas no por touch bida di tur hende pa empedi tur caso di bay for di man, pero e realidad ta, cu nos mester puntra nos mes cu loke nos ta haciendo ta suficiente.
Segun Minister cu no obstante cu nos ta trahando duro, pero mester conclui cu nos no ta haciendo suficiente. Pa e motibo aki mes Minister Glenbert Croes a pidi cooperacion di diferente colega Minister, pa nan reuni. Minister a convoca un reunion cu e otro ministernan pa Diahuebs awor, teniendo na cuenta cu e schedule di cada colega, pero tambe cu e urgencia cu Minister tin pa actua.
Minister Glenbert Croes como Minister di Asuntonan Social, hunto cu Minister President, Minister di Husticia, Minister di Salubridad Publico, hunto cu diferente departamento di Gobierno y instancianan entre otro, Hende muher den dificultad, Ministerio Publico, departamentonan entre otro di Asuntonan Social, Cuerpo Policial di Aruba, Minister a sigui bisa cu “hunto lo reuni pa weita kiko mas nos ta haciendo y unda nos mester primi e trott den cuadro di e implementacion di e crisisplan social, pa nos por Alivia e pression di e problemanan Social.”
Minister ta na altura cu e problemanan ta asina grandi, cu resolve e problemanan grave cu ta azotando nos comunidad, cu ta bibando den mente, alma, den hogarnan y den bida di hendenan na Aruba, kisas ta mustra imposibel, pero e hecho ta cu mester haci e maximo esfuerzo.
Loke a pasa Diadomingo cu e perdida di bida di e Señora Tromp ta intragabel, inaceptabel den e comunidad di cual cu nos kier ta forma parti di dje.
Violencia Domestico, abuso di hende muher, abuso di mucha, di hende bieu, abuso en general mester ta algo inaceptabel den nos comunidad.
E crisis plan social ta papia di ora nos no actua, ora ya caba e cosnan aki a tuma lugar, cu consecuencianan asina lamentable, manera locual a tuma lugar Diadomingo, no mester a pasa, mester por a preveni asuntonan asina di tuma lugar.
Henter e crisisplan Social ta bisa con pa nos bay atende cu e Redflagsnan, ora ta declara un emergencia, kemen ora algo grandi ta tumando lugar y con pa empedi pa lo peor pasa. E plan ta pa con pa preveni loke a pasa cu Rishandroh y Eugene, pa empedi casonan manera locual a pasa cu Anushka Tromp lamentabelmente.
Mester actua mas trempan y actua ta responsabilidad di nos tur, di e comunidad, di Gobierno, di departamentonan di Gobierno, instancianan, fundacionann etc nos tur mester ta alerta, henter e comunidad mester actua duro, esey ta loke e crisisplan ta bisa. Minister a termina bisando cu, “paso na Aruba ta tumando lugar hopi cos cu no mag di ta tumando lugar, entre otro loke a pasa Diadomingo ultimo.”