Eduard Watty Heyliger sorprendi cu plakkaat di hotel, unda el a traha 11 aña
ORANJESTAD, Aruba – 8 di Augustus 2018: Empleadonan di restaurant y gerencia di Riu Palace Aruba a yega hunto pa un fiesta di despedida p’e maître d di Riu Palace Aruba, Eduard Watty Heyliger, kende ta bay disfruta di su pensioen trahando 11 aña pa RIU y despues di un trayecto largo den e industria turistico. Riu Palace Aruba a desea Eduard Watty Heyliger tur cos bon y p’e disfruta di su pensioen bon mereci.
Gerencia y empleadonan di Riu Palace Aruba a sorprende Watty Heyliger cu un fiesta di despedida unda tur hende a disfruta di e canticanan di Mariachi Perla di Aruba. Vanessa Fernandez, gerente general di Riu Palace Aruba, a hiba palabra gradiciendo Watty Heyliger pa su añanan di servicio y di a siña tur hende con pa haci e trabou bon. Tambe algun empleado a hiba palabra y a dese’e tur cos bon den su pension. Den nomber di Riu Palace Aruba, Vanessa Fernandez a entrega Watty Heyliger un bunita plakkaat y holoshi. Tur presente a pasa un momento agradabel, a disfruta di e ambiente., di e snacks y co’i bebe.
Watty Heyliger ta e Manager (maître d) di e restaurantnan di Riu Palace Aruba y a traha pa 11 aña largo, pero e tin un trayecto largo den e industria turistico. Watty Heyliger a inicia su carera den industria turistico na 1962 cu su 17 aña y a traha 21 aña den Caribbean Hotel. Despues cu Caribbean Hotel a cera, el a traha 11 aña largo na Concorde Aruba. Tambe el a traha den restaurant di Caribbean Palm Village y despues bek pa Aruba Grand. Despues RIU a tuma over Aruba Grand y Watty Heyliger a keda traha cu nan.
Empleadonan y gerencia di Riu Palace Aruba a yega hunto pa asina dispidi y duna Watty Heyliger su plakkaat, kende ta bayendo cu pension. Pa su persona e momento aki tabata uno yena cu emocion, pasobra di basta tempo e ta pensa di retira pero no tabata sa con pa haci esey. “Mi a haci esaki pa 55 aña y mey. E no ta facil”, el a comenta. Prome cu el a dicidi di retira, Watty Heyliger a traha un plan di kico tur e ta bay haci asina cu e bay disfruta di su pension.
Watty Heyliger ta gradici tur empleado cu a sostene, tur cu a traha bou di dje pasobra e no tabata un hefe facil pa traha cun’e. Segun Watty Heyliger, e no tabata haci e trabou facil como hefe pasobra e tabata haci esaki pa asina tur empleado siña haci e trabou bon. E ta recorda tur empleado cu nan tin un trabou y no ta facil pa tin un. “Hopi hende ta bin traha pa 8 ora, pero no ta asina. Esaki ta bo pan di cada dia”, asina el a expresa. No djis traha 8 ora, pero cumpli cu obligacionnan y bay cas trankil. E ta recorda tur empleado pa no pleita cu compañeronan di trabou ni cu hefe, pasobra esey ta causa destruccion den tur.
RIU Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 50 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.