Home Politics Partido MEP na ex Minister Mike de Meza: UNDA BO A...

Partido MEP na ex Minister Mike de Meza: UNDA BO A LAGA E PLAN PA BAHA CORIENTE? Cu ningun hende sa di dje

SHARE

 

 

Ex Minister Mike de Meza (AVP) siman pasa a publica un articulo den cual e ta bisa cu Gobierno anterior a laga un plan cla pa baha prijs di awa y coriente. E publicacion aki a causa hopi hilaridad den comunidad.

 

Pa di prome, esaki ta un otro muestra mas cu AVP tabata un Gobierno di puro plan, pero nada di ehecucion. Puro papia bunita, pero nada di accion.

AVP tabata 8 aña den gobierno y no a baha prijs di awa y coriente. Es mas, dia 1 di october 2014, nan a hisa tarifanan cu 15%. Pueblo a protesta y manifesta pero Mike de Meza y Mike Eman a manda Riott Commando y cacho riba nan. E tempo ey bo no por a baha prijs di awa y coriente, anto awor desde oposicion si ta papia di un plan?

 

Prome Minister Evelyn Wever-Croes riba su pagina di Facebook a skibi: “Mi tin cu bay puntra sr. De Meza unda el a laga e plan aki, pasobra ningun hende sa di nada! Of ta mescos cu tur otro cos di Gobierno anterior: puro plan, nada concreto. Gobernacion ta algo serio, Aruba merece gobernantenan cu ta realisa e seriedad y no cu ta hunga weganan infantil asina y hunga cu dolor di pueblo”.  

 

REALIDAD DI MIKE DE MEZA

Realidad ta cu tempo cu Mike de Meza tabata Minister encarga cu energia, a tuma e peor decisionnan den historia di pais Aruba.  Mientras cu prijs di crudo tabata baha di drasticamente te na un punto historico di $40 dollar pa bari, Mike de Meza a hedge e prijs na $80 dollar pa bari, costando asina WEB 300 miyon florin sin por a baha e prijs di awa y coriente! E investigacion riba esaki ta andando. Nunca antes un minister encarga cu energia a comete un ‘blunder’ di marca mayor asina.

 

Aparte di masacra nos Pueblo, e ex minister aki a papia 8 aña di energia alternativo, pero no a aumenta energia alternativo na Aruba ni cu 1%. Nan a malgasta miyones na green conference, sin a yuda Aruba cu net net nada.

 

Partido MEP ta asegura cu Mike de Meza ta e ultimo persona cu por tin autoridad pa papia di e tema aki. Si en caso e plan ta existi mes, lo e ta bon scondi. Si sr. de Meza realmente kier yuda pueblo, e mester entrega e plan. De paso, e mester entrega tambe tur e documentonan cu ta mustra su propio envolvimento den e escandalo di hedging.

Of miho, e haci e pueblo aki un fabor, y e keda keto pasobra cada biaha cu e ex Minister aki papia, e ta recorda henter pueblo con el a faya como Minister di Energia!