Ainda bo debe pais Aruba placa cu bo a biaha bin Aruba pa negocia bo number riba lista
Parlamentario Endy Croes a reacciona riba Robert Candelaria Parlamentario di AVP despues di a tuma nota di locual Candelaria a papia durante conferencia di prensa di AVP diamars 31 di juli. Parlamentario Croes ta splica cu e tin hopi duele con AVP ta usa cierto personanan den comunidad pero mas pio ainda e “tiponan” aki ta permiti nan mes wordo usa di tal indole cual ta caba cu nan integridad totalmente.
Corda paga bo debe
Prome cu mi reacciona riba Candelaria mi mester recorda Candelaria cu ainda e tin un debe habri cu Pais Aruba unda Mike Eman a haya ta bon pa den luna di Juni y Juli 2017 paga cu placa di pueblo na 4 ocasion pasashi ida y buelta for di Corsou pa Candelaria kende tabata biba y traha na Corsou e tempo ey; paga su estadia na hotel di luho y paga pa un auto di huur pa asina Candelaria biaha pa Aruba 4 ves pa negocia su number riba lista. Esaki ta inaceptabel y Parlamentario Croes ta pidi Candelaria cu hopi respet pa e paga esaki y asina mustra cu no ta papia so e ta papia pero e por ta un cabayero, reconoce cu asina no por deal cu placa di pueblo pa finnan personal (Adhunto un copia pa record’e).
Dealnan di Candelaria cu AVP
Alaves Candelaria no tabata sincero cu pueblo di Aruba pasobra Candelaria a yega Aruba pa entrega lista den Augustus 2017 y mesun momento a bira coordinador di Mike De Meza y ya a cuminsa cobra un suma di 8000 florin pa luna anto su trabou tabata campaña. Pues otro abuso cu Candelaria a comete cu placa di pueblo. Tin hende cu sa sinti berguensa pero tin hende cu no tin gevoel y ni ta sinti berguensa pero gusta biba lekker. Laga pueblo huzga den cual categoria bo ta cay. Esaki no ta tur pasobra nos mester recorda pueblo e deal cu Candelaria a compacta cu AVP pa e subi lista. Tur cos tabata cla y prepara. Banda cu Candelaria a cobra 8000 florin pa luna como coordinador Candelaria a pidi e puesto pa Director di Scheepvaart. Aki Candelaria a exigi un salario di 20 mil florin pa luna. Mike Eman cumpliendo cu su deseo pa haya Candelaria riba lista a nombra Candelaria Director di Scheepvaart na October 2017, pues den pito momento cu Mike ta bahando como promer minister. Danki na pueblo cu a bin un cambio unda Evelyn Wever Croes nos actual Prome Minister a drenta pa pone ordo y “reverse” un cantidad di decisionnan contra ley di Mike Eman, entre otro e nombracion di Candelaria. Awe cu Candelaria no ta fungi como Palamentario di AVP no ta nos culpa.
Un politico deshonesto
Keriendo cu Candelaria a siña su les y bira honesto y humilde awor den un funcion cu pueblo a regal’e nos por tuma nota con Candelaria ta bay conferencia di prensa semanal di AVP actuando na un manera di “que yo no fui” of tambe crioyo bisa na un manera cu e no a kibra un copi y ta papia cacalaca cu Mike Eman ta skirbi pe. Candelario a papia riba finansa publico pero e sapato a keda mucho grandi pe. Textualmente Candelaria a splica “Nos tabata riba e bon caminda y nos a bin ta bahando e gasto, aña tras di aña, raportahe tras di raportahe nos tabata cumpliendo cu e normanan. Mi ta combensi cu nos lo a yega tur e normanan na e forma cu finansa publico tabata wordo maneha”. Quo Vadis!! E cabayero aki ta compronde Hulandes? Candelaria no a bin ningun reunion momento cu CAFT a splica na placa chikito e situacion financiero di Aruba na Juni ultimo. Ta nan custumber di no ta presenta na trabou anyhow. Nan no ta bin tende pa ‘blijf bij de les’ pero kier sali papia pataraca. CAFT a splica DUIDELIJK cu e NORM 2017 is BUITENBEREIK. Presidente di CAFT a splica tambe cu e deficit den 2017 a resulta di ta 2.6% plus e deficit di acuerdo cu e norm cu mester tabata ta 0.5% pa un total di 3.1% pa cu 2017.
Manipulado y gañado
Pa e motibo aki a honra e gobierno nobo un fecha nobo te 30 di April 2018 pa por aproba un presupuesto realistico sin cifranan artificial manera esnan di AVP. Pakico Candelaria un ex polis cu mester ta un persona integro y un persona cu no ta gaña, apenas den 1 aña afilia cu AVP a perde su integridad por completo y ta practica un politica di un manipulado y gañado first class awor? Mi ta sorprendi e cambio den actitud di Candelaria. Pero ora bo asocia bo mes cu un partido di sinberguensa y corupcion, bo no por spera otro. Finalisando Croes ta bolbe apela riba Candelaria pa paga e 4 ticketnan di Corsou – Aruba- Corsou di Juni y Juli 2017 cual Pais Aruba a paga pa bo sin cu bo ta den servicio di pais Aruba, pues contra ley y contra tur etica. Moralidad, Dignidad y Honestidad bo no por cumpra nan den tienda, Croes ta termina bisando.