Segun Candelaria gobierno a priminti Radar, Helicopter y 200 Polis pero nada ainda
Segun Parlamentario Endy Croes, Robert Candelaria ta anda cu hende robes y a pega cu e malesa di caya di AVP. Croes a tuma nota di Candelaria su declaracionnan den conferencia di prensa di AVP diamars 31 di Juli ultimo. Na prome lugar Candelaria mester tin hopi berguensa pa ta esun di AVP cu kier trece e cosnan aki dilanti. Candelaria debe pais Aruba 4 ticket di Corsou pa Aruba como cu Mike Eman a paga esakinan pe na Juni y Juli 2017 pa Candelaria bula bin Aruba riba custia di e pueblo aki bao titulo di “werkbespreking” siendo Candelaria ta biba y traha na Corsou. Tambe Candelaria a subi lista di AVP y a cuminsa cobra Afl. 8000 pa luna como coordinador di Mike De Meza. Esey no ta tur pasobra el a negocia tambe pa e bira Directeur na Scheepvaart. Pues un abusador di pueblo so por tuma tanto placa den corto tempo y lo keda exigi Candelaria pa por lo menos paga e 4 ticketnan aki bek na pais Aruba.
Destruccion di e radarnan
Durante conferencia di prensa Candelaria kende ta riba training di Mike Eman pa manipula y gaña a splica cu den campaña a priminti cu lo bin bek cu Helicopter, Radar y lo introduci 200 polis segun Candelaria den 100 dia. Aki nos ta tuma nota e grado di sinberguensa cu un hende por bira y pega cu e virus cu yama “politica anticua” pa mal informa un pueblo y purba score of gana simpatia. Candelaria por tabata mas sincero si cu pueblo. Candelaria mester a splica pueblo promer dicon Dowers di AVP su amigo intimo a laga destrui e radarnan existente cu tabata gara tur movecion di botonan chikito riba lama? Dicon Candelaria no a protesta e tempo ey? Dicon e no a bisa Dowers cu Aruba mester di nan y no destrui nan pasobra esey lo cay bou entre otro kapitaalvernietiging?
Eliminacion di Helicopter
Ban pa e helicopter. E helicopter aunke ta Rudy Croes di MEP a introduci’e el a yuda Aruba masha hopi y sigur a yuda polisnan masha hopi mes. Dicon Candelaria no a bisa Dowers pa no kibra e contract pasobra e Helicopter a yudanan hopi den controla costa, momentonan di atraco, control durante carnavalnan pa nombra algun. Candelaria a sinta aplaudi tur e tempo e decisionnan y awe tin e pudor di tilda e gobierno actual cu ainda ni radar ni helicopter no t’ey? Bo ta na e adres robez Candelaria. Como Parlamentario bo tin e derecho di acuerdo cu ley pa haci e Minister di Husticia pregunta por escrito y basa riba su contesta bo por saca bo conclusion. Pero keda sin yega trabao pa mas di 6 siman y manera un cobarde bay tilda minister di husticia pa helicopter y radar den conferencia di prensa ta falta di tur etica. Kisas bo no sa di bo derecho pero nos di Coalicion lo brindabo ayudo e promer dia cu nos mirabo bek den edificio na parlamento.
Engaño y mas engaño
Otro engaño ta ora bo menciona cu a core campaña cu lo prepara 200 polis pa e promer 100 dianan. Pakico tanto engaño? Abo mas cu tur hende mester por sa cu Aruba tin e capacidad pa prepara 50 polis pa aña cu ta wordo dividi den 2 grupo di 25 polis den un aña. Ta di eynan bo a bin y bo ta suppose di sa toch? Virus di AVP a dal bo duro? A splica cu den 4 aña lo logra prepara 200 polis esta 4 aña na 50 polis pa aña. Pues engaño tras di engaño. Cu e politica cu bo ta hibando hamas y nunca bo por bolbe bek den cuerpo policial como cu un polis mester ta un persona integro pero awor pueblo ta mira bo calidad y bo manera di trece mentira tras di mentira cu bo no ta un persona cu ta conta cu integridad. Es mas Minister Bikker a splica cu e ta bezig tanto cu Radar y Helicopter y den lunanan nos dilanti nos lo por mira e adelantonan.
Finalmente boso di AVP hunto cu Mike Eman a “masacra” e pais aki ultimo 8 aña creando un desaster financiero anto bo ta expect den 100 dia nos por tin un “toverstok” pa drecha e desaster cu boso a laga atras? Mi mensahe pa bo ta sea un bon ser humano honesto, digno y humilde y stop di lesa for di papel cu Mike Eman ta prepara pa bo. Sea bo mes, Croes ta termina bisando.