Fraccion di POR a expresa cu nan ta totalmente den desacuerdo cu e declaracionnan di Minister di Relacionnan Exterior di Reino, Stef Blok pa loke ta trata e sociedadnan multicultural, cual Minister Blok a bisa no por biba den harmonia y hasta a tribi di bisa cu Surinam ta un estado fracasa pa e motibo ey.
Fraccion di POR ta bisa explicitamente cu e declaracionnan di Minister di Relacionnan Exterior ta contra Statuut y contra principionan di Reino Hulandes, manera ta e cooperacion entre otro y pa promove pa e paisnan den Reino biba den harmonia y paz.
Durante decadanan e forsa di Reino Hulandes a keda demostra di ta su tolerancia, su aceptacion y e forma cu diferente cultura y nacionalidad a sa di biba den harmonia cu otro.
Aruba, nos pida baranca ta un ehempel bibo di dje, unda casi 100 diferente tipo di nacionalidad ta biba den harmonia cu otro y ta traha conhuntamente pa hiba nos isla padilanti. E multiculturalidad di nos isla ta un di nos puntonan fuerte cu ta resalta tur rond mundo y ta un principio cu como parti di Reino Hulandes nos ta para fuertemente pe.
Pa tal motibo, Fraccion di POR ta expresa su disgusto pa cu e declaracionnan di Minister Blok, kende den su posicion di Minister di Relacionnan Exterior di Reino Hulandes ta representa nos isla y e otro partinan di Reino Hulandes den Caribe tambe y nos ta un muestra bibo cu su declaracionnan no ta cuadra cu realidad, nos ta biba den harmonia cu otro y esaki ta parti esencial di e logronan cu nos islanan a conoce.
Fraccion ta laga e pregunta aki atras: Con un persona, cu ta expresa su mes di tal forma contra loke nos como parti di Reino Hulandes ta para pe, por representa nos como Minister di Relacionnan Exterior?