Home Police Conocido di polis deteni pa joyriding di un Kia Picanto

Conocido di polis deteni pa joyriding di un Kia Picanto

Tamarijn: Diadomingo pa mas o menos 8’or y mey di mainta, ta drenta un informe cu doño di un Kia Picanto oranje ta coriendo tras di su auto cu den oranan di mainta a wordo horta for di su cas na Piedra Plat. E auto a wordo horta door di un conocido di Polis R.Lacle kende ta biba banda di unda e doño di e auto ta biba.

Na momento cu e doño di e auto a topa su auto riba caminda, ela yama polis y a sigui e auto, nan tabata coriendo di Bloemond bayendo Tamarijn su tras. Dilanti di un cas na Tamarijn e conocido di polis, a hinka e Kia Picanto riba e tereno di e cas banda di varios auto cu tabata staciona den e cura, aparentemente e lo tabata amigo di e yiu di e doño di e cas, pero e doño di e cas a coopera full cu polis y no tabata kier e conocido di polis aki riba nan tereno.

Polis a yega na e cas na Tamarijn y a detene e homber aki, transportwagen di polis a bin buske y na momento cu polis tabata hibando e na e transportwagen, e homber ainda tabata tin e pudor di bisa e doño di e auto cu ta un tal David a horta e auto y cu e topa su auto pabou nan aya y cu e tabata treciendo e auto p’e, cual sigur ta gañamento.

E auto a wordo transporta cu takelwagen pa warda di polis na Santa Cruz pa mas investigacion.