Mr Carl Giel di AVP: No por stimula economia si ta impone medida cu ta reduci poder di compra

E miembro di partido AVP, mr. Carl Giel a mustra cu e lo dirigi algun pregunta na tres minister di gabinete Wever Croes, relaciona cu e decision anuncia pa Minister di Finansa, cu a duna permiso na negoshinan pa nan keda habri te cu 12 di anochi.
Un decision cu sr Giel ta mustra di a lanta varios punto di discusion, ya cu gobierno mes no a duna mucho detaye y motibo di e decision aki, apesar cu Minister di Finansa a mustra cu esaki lo ta un esfuerso pa stimula comercio.
“Mi tin varios pregunta na e ministernan concerni, relaciona c’un decision di e minister di economia, pa aumenta e orario pa cierto negoshinan keda habri te mey anochi y ta bon mi mustra aki cu tin negoshinan cu ta cay bou di decisionnan di horeca y tin esunnan cu ta den e categoria di keda habri continuo.
Decision di e minister ta encera otro negoshinan cu no ta cay bou di e dos tipo di negoshinan ya menciona y ta mas tanto pa pacusnan, hardware storenan, super mercadonan, kiermen esaki ta un ampliacion di ora te cu 12’or di anochi.
Mi prome pregunta lo ta na Minister di Economia, con el a yega na e decision aki, pasobra el a declara cu esaki ta pa stimula comercio, pero bo ta bay stimula comercio cu e decision aki, si un di e factornan mas importante pa stimula comercio, ta e poder di compra di e ciuedadanonan.
Nos ta den un periodo caminda gobierno a impone medida riba ciudadanonan cu aumento di BBO y BAZV, cu a bay te na 6% mientras cu tin mas medida na caminda y tur esakinan ta afectando eigenlijk e poder di compra di e ciudadano, cual ta e factor mas importante pa stimulacion di comercio.
Habrimento di e negoshinan aki pa mas ora, no lo bay trece un cambio den esaki, pasobra e poder di compra di e ciudadano, kende tin cu bay cumpra den e negoshinan aki, a bay atras.
Ora cu bo implementa un medida riba ciudadanonan, nan ta bay reacciona den dos forma, esta sea cu nan ta bay wanta nan placa yno ta bay gasta hopi, of nan no ta bay tin pa gasta.
Pues mi pregunta na Minister di Economia ta con el a yega na e conclusion cu habri e negoshinan pa mas ora, lo bay stimula economia.
Mi tin cu cuestiona e decision aki ya cu den nos opinion, esaki no ta bay resulta den locual e Minister ta premira, esta cu e ta bay stimula economia pero locual si e ta bay afecta, ta e parti social di e trahadonan.
Loke mi kier bisa cu esaki ta cu e trahadonan ta bay tin ora na trabou y menos ora pa dedica na nan famia y den esaki e atencion mas tanto cu nan mester bay dedica na nan yiunan.
Pues e tempo liber cu nan tabatin pa yuda na yiunan cu por ehempel nan huiswerk, duna nan atencion, combersa cu nan, esey lo bay ta menguando y consecuencia di esaki ta cu e yiunan por bay busca e atencion aki otro caminda, loke por resulta cu nan ta bay atras den nan estudio, nan por bay cay den mannan di criminalnan cu por hiba nan den mal caminda.
Tur esaki ta e parti social cu ta bin cu e decision di cambio di orario aki,” mr. Carl Giel di AVP a declara.