Oranjestad: Diabierna pa mas o menos 10’or di anochi, ta drenta un barco di carga procedente for di Venezuela. E barco a wordo guia pa Kustwacht pa drenta waf di Oranjestad.
Durante cu kustwacht tabata patruyando riba lama grandi nan a topa cu un barco cu a confronta problema riba lama, coriente di e barco a cay afo y despues e motornan di e barco a cay afo, cu consecuencia cu e barco tabata drief bay mas leu for di tera. Abordo lo tabata tin 5 pa 6 tripulante, e barco tabata carga cu fruta cu lo mester a wordo treci pa Aruba of Corsou.
Despues di tres dia, di ta perdi y ta drief riba lama, e miembronan di e tripulante a cuminsa bira desespera. Durante cu nan tabata drief, e boto cu tabata demasiado carga cu fruta y a cuminsa ta sink, e tripulante a cuminsa benta fruta den lama, pa asina trata na scapa e boto.
Na momento cu Kustwacht a bin topa cu nan, nan tabata mustra basta desespera, un miembro di e tripulante a bira malo abordo. Mesora kustwacht a rescata e barco y a guianan pa drenta Waf di Oranjestad.
Ora e barco a drenta waf di Oranjestad, ambulance a wordo pidi pa trata e miembro di tripulante cu tabata malo. Despues cu personal di ambulance a trata e miembro di tripulante, pa un of otro motibo e no kier a wordo transporta pa hospital pa haya un tratamento mas avansa
E barco a keda ancra den Waf di Oranjestad, mientras tanto nan tabata wardando riba nan representante na Aruba pa regla tur nan papelnan pa nan por regresa Venezuela.