Reunion den Parlamento pa trata gastonan di personal:
Lo aplica otro formanan pa baha gastonan
Aruba awo ta conta cu un Parlamento serio y critico cu kier ta bon informa y na haltura di tur loke ta pasa den maneho di Gobierno. Diaranson ultimo Prome Minister Evelyn Wever-Croes a wordo yama pa Parlamento pa un reunion publico pa asina splica loke cu Gobierno di Aruba ta deliberando cu Hulanda.
Despues cu CAFT a anuncia cu Aruba mester baha gasto di personal cu 12 miyon florin, a bin hopi confusion y bastante rumor cu e Gobierno aki lo bay kita un cantidad di ambtenaar for di trabou.
Premier di Aruba a splica extensamente loke e plan financiero di gobierno ta encera. Meta ta pa aña 2019 baha e deficit te pa yega na un -0.5 porciento cu ta 25 miyon florin. Aña 2019 e mester bira un surplus di 25 miyon florin y e siguiente aña un surplus atrobe di 50 miyon.
Di e manera aki, segun Prome Minister, poco poco Aruba lo sali for di e deficit y yega na un surplus aunke surplus riba su mes no ta e meta. E meta ta pa baha e debe nacional cu actualmente ta casi 90 porciento y esaki ta stroba e pais su stabilidad economio y financiero. Segun e plan di Gobierno di Aruba, lo baha e debe na 70 porciento na aña 2027. Na aña 2039 e debe lo wordo baha te cu 50 porciento.
Prome Minister a trata e punto di supervision di CAFT tambe den e reunion den Parlamento indicando cu probablemente CAFT lo keda mas o menos 3 aña mas na Aruba mientras cu Aruba mes lo cuminsa mesora cu su propio Begrotingskamer pa asina nan haya confiansa y gana experiencia. Una bes cu CAFT bay, Aruba por conta cu su propio organo di supervision cu suficiente stabilidad y conocemento.
Tocante gastonan di personal, Prome Minister a indica cu pa logra nos plan pa baha e deficit y e debe na 50 porciento aki 21 aña, aña 2039, awe Aruba mester tuma e desicionnan necesario. E mandatario principal di nos pais a enfatisa cu Gobierno di Aruba lo no bay kita hende for di trabou y lo no bay mishi cu e derechonan existente di esnan trahando. No lo mishi cu ‘vakantie uitkering’, cu bonus y premienan. Gobierno lo aplica otro formanan pa atende cu e tema aki den termino corto.
“Esaki tawata un bon reunion cu hopi bon aporte. Parlamentarionan di tanto coalicion y oposicion tawata tin bon sugerencianan cual ami ta considera un hopi bon reunion pa wak cu Parlamento ta bin hunto y realisa cu nos mester haci algo pa mehoracion di nos pais”, Prome Minister Evelyn Wever-Croes a duna di conoce.