Philipsburg – Colegio di supervision financiero (Cft) a haci un bishita na St. Maarten di 25 pa 27 di juni. Durante e bishita aki Cft a subraya e importancia di traha pa logra un presupuesto balansa den un futuro cercano. Sinembargo, pa 2018 lo tin mester di apoyo di likides a corto plaso. Otro tema di deliberacion tabata e necesidad di mehora e maneho financiero, solucion di e problemanan persistente di Tecnologia di Informacion y hayamento di asistencia tecnico.
Na Sint Maarten Cft a haci un bishita cerca Gobernador di Sint Maarten, Ministro di Finansa, Conseho di Ministro y e Comision Financiero di Parlamento. Tambe Cft a tene combersacion cu varios instancia interesa, manera SZV, Servicio di Impuesto, Controlaria General, e miembro di Comite Directivo na nomber di Sint Maarten y e partinan cu ta implica den e proceso di reconstruccion.
Encuanto e presupuesto di 2018 Cft a bolbe expresa su preocupacion pa e posicion precario di likides y e deficit presupuestario actual. Raymond Gradus (Cft): “A pesar di e situacion dificil ta importante pa tuma medida pa reestablece e ekilibrio presupuestario mas lihe posibel.” Cu esaki Cft ta referi na su punto di bista cu Sint Maarten mester limita e deficit presupuestario mas tanto posibel. Medida di reduccion di gasto, ampliacion di e base pa cobro di impuesto y mehoramento di cumplimento ta di vital importancia pa logra e obhetivo ey. Den e deliberacion cu SZV a participa Cft e experiencia di SZV cu mehoramento di cumplimento. Sint Maarten ta bay tin mester pronto di likides adicional pa por cumpli cu su obligacionnan financiero y, den e contexto ey, a haci un peticion na Conseho di Ministro di Reino. A discuti ampliamente e desafionan actual di Sint Maarten riba tereno di finansa publico cu e Ministro di Finansa recientemente nombra, kende a reconoce e desafionan y a motiva su ambicionnan pa e proximo añanan.
Sint Maarten a realisa esfuerso importante pa presenta den e ultimo lunanan diferente documento presupuestario. No solamente Gobernador a aproba finalmente e presupuesto di 2018, sino tambe Cft a ricibi e di dos reportahe semestral di 2017 y e reportahe di e prome kwartaal di 2018. Aunke a manda mayoria di e documentonan aki pa Cft numa despues cu e fechanan limite a expira caba, Sint Maarten a progresa den su aspiracion pa cumpli cu e fechanan limite ey. Sinembargo, e cuentanan anual di 2013 pa 2016 ainda ta sigui pendiente.
Aunke Sint Maarten a logra reduci e retraso den e reportahenan financiero, e maneho financiero ta sigui ta inadecuado y e problemanan di Tecnologia di Informacion ta keda persisti. Cft a enfatisa e importancia di asistencia tecnico den e contexto aki, en bista cu Sint Maarten no a logra mehora e maneho financiero ni por a resolve e so e problemanan di Tecnologia di Informacion. A informa Cft cu di berdad Sint Maarten ta trahando riba creacion di capacidad adicional pa ataca e problemanan ey, pero ainda mester alcansa e obhetivo ey. E necesidad di mehora e ciclo presupuestario ta bira cada bes mas importante pa di e forma ey mehora calidad di e reportahenan y cu esey fundamenta e necesidadnan di likides pa 2018. Cft y Gobierno a delibera tocante e procedura relaciona cu un pago di likides trimestral. E bentaha di un procedura asina ta cu e ta permiti incorpora den dje informacion nobo tocante ingreso y gasto. Tambe reportahe mensual di ingreso y gasto ta haci posibel un miho evaluacion di e posicion di likides y di e deficit spera.
E forma cu economia di Sint Maarten ta recuperando ta di crucial importancia. Cft a keda contento di ricibi e Plan Nacional di Recuperacion y Superacion definitivo, den cual ta describi e necesidadnan di recuperacion y ta presenta un cuadro di implementacion pa e plan di recuperacion. Ta di sumo importancia pa stimula e crecemento economico di Sint Maarten pa medio di esfuerso di reconstruccion. Stancamento den e esfuersonan di reconstruccion lo por tin un impacto negativo riba crecemento economico y lo por retrasa e proceso di traha riba ekilibrio presupuestario. Restauracion y specialmente reconstruccion di e aeropuerto no ta solamente na interes di Sint Maarten, sino tambe di Sint Eustatius y Saba, en bista cu Sint Maarten ta fungi como un centro importante pa e islanan ey.
E bishita di Cft aki tambe tabata caracterisa pa e despedida di e coleganan Sybilla Dekker y Maria Plantz. Sybilla Dekker ta stop entrante dia 1e di juli di e aña aki; e tabata miembro di Cft for di zomer di 2012. Sybilla Dekker tocante su periodo den Cft: “Esaki ta mi di dos bishita despues di e horcannan. Mi ta consciente di e enorme retonan cu tin dilanti di nos, y e capacidad di recuperacion di e poblacion di Sint Maarten ta sigui impresiona mi.” Pa Maria Plantz tambe esaki ta su delaster bishita, en bista cu a nombr’e miembro di Conseho di Estado pa Sint Maarten entrante dia 1e di october. Entrante dia 1e di juli 2018 Cft ta consisti di Raymond Gradus (presidente), Gregory Damoen (Corsou) y Henk Kamp (Hulanda). Pronto lo anuncia e sucesor di Sint Maarten.