Gabinete Wever-Croes cu gran satisfaccion y orguyo ta informa pueblo di Aruba cu e trabao duro di gobierno a wordo recompensa y Aruba ta mantene su status di inversion di Standard & Poors.
Prome Minister Evelyn Wever-Croes a indica cu esaki ta un bon noticia cu a yega na gobierno unda cu un palabra di gratitud e tin pa cada un persona cu tabata tin e oportunidad di a sinta na mesa, Standard & Poors, y sigur Minister di Finansas Xiomara Ruiz-Maduro y su ekipo cu mester a coordina tur e trabaonan cu a wordo haci.
Gobierno a splica Standard & Poors e esfuersonan cu nan ta haciendo, pa asina por mantene e rating di inversion na Aruba, cual ta asina importante pa nos pais.
Minister Ruiz-Maduro a señala cu Aruba tabata para riba un crusada hopi peligroso, den cual sea nos pais ta bira un luga sigur pa inversionnan wordo haci, of Aruba lo a wordo degrada como un pais na unda inversionnan no ta sigur mas.
Esaki lo a nifica cu inversionnan cu nos tin mester urgentemente, nos lo por haya si pero na un interes hopi mas halto, mientras cu ya caba nos pais ta pagando mas di 210 miyon florin anual na interes. Si nos tabata tin un rating mas degrada esaki lo a genera mas problema pa nos pais, segun e dignatario a splica.
Tanto Minister President como Minister di Economia y Finasa a reacciona alivia cu Standard & Poors a bin, a scrutina nos pais, a papia cu tur e stakeholders importante, y e resultado ta cu Aruba ta mantene su rating di inversion BBB+.
Nos tin un rating triple B Plus pero locual si nan a mantene e proyeccion na negativo, locual tabata di spera debi cu e proyecto di e refineria cu mester a bira activo, y Aruba mester a haya su frutonan economico, no a materialisa, y Standard & Poors ta indica cu e proyeccion ta negativo.
E mandatario a agrega cu no mester lubida cu ora Standard & Poors a bishita Aruba durante e otro gobernacion, e gobierno anterior a pone hopi enfasis riba e crecemento economico cu lo mester a resulta for di e refineria y a indica cu lo mester a bin 600 cupo di trabao. Esaki lo a duna un efecto positivo pa locual ta entrada di belasting, pero esaki no a materializa y nos pais no a haya e entradanan aki di belasting, ni di e refineria, y e refineria mes no a cuminsa.
Awor por mira cu trabou duro y persistencia ta duna su fruto. Siman pasa Caft a duna su veredicto riba e presupuesto 2018, y Aruba a scapa un KB, y awe ta bin e reaccion positivo aki di Standard & Poors.
Pabien na Gabinete Wever-Croes y pueblo di Aruba.