Cada baby cu nace na Aruba ya caba tin un debe di Awg. 45.000,- riba su cabes!
Durante e reunion cu Comision fiho di Asuntonan Financiero y Economico di Parlamento tabatin cu CAFT diabierna ultimo, diferente punto importante a keda trata y alabes CAFT a duna algun conseho. Un di e consehonan aki ta pa na Aruba nos hiba un debate con ta bay stimula crecemento economico na un manera sano, esta sin crea debe.
Segun sr. Gradus, nos no por sigui logra crecemento economico door di crea debe. Alabes ta keda enfatisa cu di suma importancia cu Aruba ta para keto un rato y stipula con ta bay compensa e deficit financiero existente.
Un remarke cu sigur nos di Partido Movimiento Electoral di Pueblo a bin ta usa durante di campaña y awor a keda usa durante di e reunion door di CAFT, ta e echo cu na e momentonan aki cada baby cu nace aki na Aruba ya caba tin un debe di Awg. 45.000,- riba su cabes.
Na mi opinion esaki sigur ta muestra y consecuencia di e maneho desastroso cu Gobierno di AVP a hiba durante ultimo 8 añanan, sosteni pa nan Parlamentarionan den Parlamento. Remarcabel ta e echo cu na e reunion aki tabata presente diferente Parlamentario di AVP y ningun a contra aresta e remarke di sr. Gradus ora el a indica di no ta di acuerdo cu e maneho hiba pa loke ta trata logra crecemento economico door di crea debe manera AVP a haci durante e ultimo añanan. Mi ta kere cu cifranan no ta gaña y ora bo no tin argumento en contra y cu bo sa cu ken bo ta sinta na mesa, bo mester scoge pa keda keto y admiti.
Realidad ta cu e gobierno actual aki ya caba a demostra corahe y determinacion y ta carga nan responsabilidad caminda, cu dolor na curason, a haci lo corecto y entrante 1 di juli 2018 ta introduci e Crisisheffing temporario.
Den medionan di comunicacion opositornan ta condena introduccion di crisisheffing, lubidando pa informa pueblo cu nan tambe tabatin den tapara un reforma fiscal cu introduccion di un ABB y financial transaction tax, cu tabatin como meta pa genera e fondonan necesario pa paga e.o. e gastonan di e proyectonan PPP. Pero nan no tabatatin e curashi y madurez politico pa haci esaki.
Awe nan kier grita pero nan sa cu Gobierno mester crea e fondonan necesario pa paga e debenan cu nan a crea.
Ta mas cu logico cu Gobierno a corto plazo mester genera mas entrada pa por atende cu retonan ariba tereno financiero y alabes pa realisa e inversionnan necesario ariba diferente tereno. Gasta placa sin tin esaki y of indicando di unda e fondonan lo bin pa paganan, a costa nos hopi crisis caba y a demostra di no a funciona.