Parlamentario Endy Croes ta reacciona riba Benny Sevinger despues di a scucha Benny grita y gaña pueblo di San Nicolas dialuna ultimo. Tin biaha bo ta puntra bo mes cu tin hende den bida tin basta curashi. Pakico mi ta bisa esaki? Benny Sevinger netamente ta un di e coruptonan di mas grandi cu Aruba a conoce den su historia. Benny a hiba un politica di hipocrita, corupcion, ladronicia y awe ainda kier pretende cu el a haci bon. Pasenshi ta algo den bida cu kisas hopi hende no tin. Ami como Parlamentario papiando di propio experencia a wordo lastra y tilda pa AVP den su totalidad pa masha hopi cos cual nunca a tuma lugar. Mi famia a wordo lastra y ataca riba cosnan cu nunca AVP tabata tin rason. Pero den e transcurso di tempo nos a siña cu pasenshi ta e “key”, primordialmente ora bo deal cu husticia. Hopi biaha bo kier pa e caso caba e dia siguiente pero realidad esaki tin su facetanan y hopi biaha ta dura añanan.
Ladronicia di tereno di pueblo
Pa e rasonnan aki mi por compronde un gran parti di pueblo cu tin e deseo ferviente di mira politiconan di AVP kendenan di berdad a “HORTA” e pais aki y/of a participa den diferente actonan coruptivo cera tras di trali pa e desaster cu nan a causa na pais Aruba. Pasenshi atrobe ta e “KEY”. Benny Sevinger ta un di e politiconan di AVP cu a usa su Bureau hunto cu Abath, Every, Louchi pa nombra algun pa corumpi nos leynan y asina usa amigonan manera Leoncita pa bende masha hopi tereno. Por corda Deshaun NV di Leoncita cu a haya 5000m2 meter di tereno como optie riba un NV cu no tabata ni lanta ainda y a logra bende esaki y placa a hit acccount di Leoncita na Miami. Benny a firma akkoord pa e tereno aki 7 di Augustus mientras e fecha cu e carta ta traha ta ilustra 20 di Augustus. Pues pa slordigheid den ladronicia di tereno a firma y skirbi un fecha promer cu e carta ta traha. Valsheid in geschrifte tot en met. Asina tin email cu un tal Cabral ta manda pa Leoncita cu e promer 100 mil florin ta cla pa wordo paga manera cu Benny firma. Asina tin otro tereno di 42000m2 den Colony cual peticion a drenta 14 di september y 15 di september ya Benny a firma y awe e tereno aki a wordo bendi caba cu grupo Spaño. Pa trankilidad di pueblo tur e pruebanan aki a wordo entrega na Ministerio Publico caba. Tin prueba suficiente unda por comproba e gang corupto di bandidonan hunto cu Benny cu a enrikece nan mes riba lomba di e pueblo aki.
Investigacion mester wordo haci
Ministerio Publico awor ta na palabra y no tin lugar pa duda cu investigacion mester wordo haci pa e culpabelnan paga pa nan actonan coruptivo. P’esey momento mi a tende Benny grita na San Nicolas manera cu e nunca a kibra un copi mi mester reacciona riba Benny y AVP pa recordanan. No kere cu boso a scapa. Pasenshi ta e “Key” y un pa un boso lo mester bay duna cuenta y pueblo lo wordo confronta cu e tristo realidad di un Minister Corupto te den su higra. Ni papia mes ainda di permisonan cu tabata wordo firma na su cas na cantidad. Ni papia mes di amigonan di Ecuador cu a traha su pool na su cas a cambio di fix nan permiso y nunca a paga nan nan salario. Esaki ta tipo di Minister cu a goberna e pais aki. Awe ni 7 luna despues kier lanta pueblo pa baha un gobierno cu apenas ta drechando e lugar aki pa coruptonan y LADRONNAN asina nunca mas bolbe den poder. Pasenshi Benny Pasenshi!!!!