Durante e evento Small Business Event cu participacion di nos empresanan chikito y mediano
ORANJESTAD – Riba diahuebs 21 di juni lo tuma lugar un dia di “Small Business Event”, cual ta carga e nomber The New Era of Entrepreneurial Development. Esaki lo tuma lugar na Renaissance Convention Center, for di 8’or di mainta pa 4’or di atardi. E evento aki ta wordo organisa pa Departamento di Asuntonan Economico seccion IDEA cu sosten di Ministerio di Finansa, Asuntonan Economico y Cultura, cual ta dirigi specialmente pa negoshinan nobo y existente. Ademas ta un bon oportunidad pa nos studiantenan, inversionistanan, Institucionnan Financiero y esnan cu ta formula di maneho.
Minister di Finansa, Asuntonan Economico y Cultura, sra. mr. Xiomara Ruiz-Maduro lo duna apertura na e evento aki caminda e lo presenta “Aruba’s Entrepreneur Development Policy for Aruba 2018-2021”, e plan di accion pa entrepreneurnan pa diversifica nos economia, crea mas oportunidad y infrastructura pa amplia y crea caminda di exito pa e sector empresarial. Gobierno den su maneho a bin ta tuma diferente iniciativa pa mehora y reforsa e clima di negoshi, especial nos empresanan chikito y mediano, cual ta weso lomba di nos economia.
Tin un programa amplio prepara cu presentacion di diferente profesionalnan, pa Departamento di Asuntonan Economico, Comercio y Industria, sra. Sharon Meijer, lo presenta “Aruba’s Entrepreneurs Policy” y despues lo toca turno na e nominadonan di Guardian Group Award pa duna nan presentacion.
E evento aki lo conta tambe cu invitadonan di exterior caminda moderadornan lo ta presente sr. John Sandiford di Antonio Media y Founded by AllProject Manager for di Eindhoven, sra. Gonneke van den Kieboom di WOW! Innovation, Marketing and Communication lo bini for di Corsou, sr. Dominick Rolle lo tey for di Turcs & Caicos, sr. Meade Malone di Forge lo bini for di BVI Tortola.
Pa Aruba lo tin como moderador sr. Kawish Misier, Miembro di directiva di y Vice Presidente di Camara di Comercio y Industria di Aruba y sra. Sonja Velthuizen, directora di Camara di Comercio y Industria di Aruba. ‘Business Incubation’ lo ta e topico principal cu e moderadornan tanto local como di exterior lo focus riba dje. Ademas Universidad di Aruba lo tin un representante cu lo presenta e oportunidadnan cu nos pais Aruba tin pa instala un Incubation na Universidad di Aruba.
Despues di e presentacionnan lo tin sesionnan interactivo cu un grupo di personanan local y expertonan internacional cual lo forma parti den un panel cu lo tin experticio riba modelonan innovativo pa ‘Business Hubs’ na Aruba, cu e meta pa por transforma e economía di Aruba den un era nobo riba e desaroyo empresarial. Aki ta duna oportunidad pa cada uno trece nan idea, pasobra Bo Idea tambe ta conta pa e era nobo di e desaroyo empresarial na nos pais. Minister di Finansa, Asuntonan Economico y Cultura sra. mr. Xiomara Ruiz-Maduro ta haci uso di e oportunidad pa gradici tur esnan cu a duna nan sosten y contribucion pa haci e evento aki posibel, especialmente tur esnan di COSME Team. Ademas e mandatario ta acentua cu e evento aki ta un gran oportunidad pa e participante amplia su red cu lo tin su beneficio pa su negoshi y desaroyo di habilidad y capacidad empresarial pa futuro.
FINAL