Den su ansha y desesperacion partido AVP durante e ultimo simannan aki a trata di venena mente di pueblo cu e gobierno actual den e ultimo 7 lunanan a aumenta e prijs di gasolin den forma drastico solamente cu e meta pa gasta placa di pueblo den forma descabeya, ya cu esey tabata custumber caba di Gabinete Eman y cu nan a kere cu tur hende ta mescos cu nan. Sinembargo cifranan estadistico no ta gaña y ta p’esey partido MEP ta trece e tabel adhunto pa mustra pueblo e desaroyo di e prijs di gasolin durante e ultimo 7 lunanan di Gabinete Wever-Croes.
Nos por mira cu entre November 2017 pa Juni 2018 na 2 ocasion so tabata tin un reduccion den e prijs di crudo riba mercado internacional. Igualmente nos por constata cu na dos ocasion so tabatin un reduccion di e prijs di gasolin. Pero si analisa e desaroyo di prijs di crudo y prijs di gasolin durante e ultimo 7 lunannan nos por mira cu e porcentahe total di aumento di prijs di crudo tabata 18.6% y e porcentahe total di aumento di prijs di gasolin tabata 13.2%. Pues claramente tur hende cu sano huicio por mira cu na ningun momento so e gobierno di MEP-POR-RED kier perhudica nos pueblo door di aumenta e prijs di gasolin den forma despropocional manera cu e instigadornan di AVP kier bende cu pueblo. Alcontrario, nos por constata cu e prijs di gasolin no a sigui completamente e aumento di prijs di crudo riba mercado internacional, pero te hasta a keda 5.4% bao di esaki.!
Pero mirando cu e pueblo inteligente no a cay den e manipulacion aki di partido AVP, awo nan a bin cu un otro ‘spanta parha’ riba pueblo, esta cu e gobierno actual lo aumenta e prijs di gasolin cu 43 cen entrante juli proximo. Aparentemente e politiconan aki di AVP ta mira sea zombie of pitufo tur caminda y awo kier spanta pueblo cu e locuranan aki.