Home Politics Prome Minister Evelyn Wever-Croes: NOS MESTER CUMINSA INNOVA AWOR! Innovacion lo ta...

Prome Minister Evelyn Wever-Croes: NOS MESTER CUMINSA INNOVA AWOR! Innovacion lo ta e oxigeno pa duna desaroyo economico bida atrobe

Minister President Evelyn Wever-Croes a habri e prome edicion di Aruba Innovation Summit, den presencia di representantenan di sector publico y sector priva. Tabata un dia hopi informativo, den cual e participantenan a participa activamente y a contribui na ideanan nobo y innovativo. Esnan presente tabata determina, cu ta basta cu papia tocante innovacion, awor ta tempo pa actua.

“Gobierno di Aruba kier formula un vision riba INNOVACION hunto cu tur sector den nos comunidad. E plan di gobernacion ‘Hunto pa Aruba’ ta basa riba e vision di un desaroyo socio-economico duradero y balansa, manteniendo e ser humano central, y cu enfasis riba innovacion. Innovacion ta un herment importante pa por logra nos metanan y atende cu e retonan nos dilanti. Como pais, no ta un secreto cu nos tin un gap grandi di innovacion y tambe cu nos falta hermentnan pa hisa nos capacidad pa por innova. “Pesey nos ta aki awe, pa hunto nos fiha e direccion pa cera e gap aki. Mundo ta cambiando lihe. Mita di e muchanan cu awe ta bay scol basico, lo traha mañan den trabounan cu awe no ta existi. Nos ta preparando nan debidamente pa esaki? Nos ta sperando otro resultado si nos ta haciendo e mesun cosnan?
Si como pais nos kier progresa y cosecha exito den futuro, nos tin cu tuma innovacion na serio awor si, y keda sin inverti den e tereno aki no ta un opcion mas. Si nos inverti den nos hendenan, esaki lo catalisa innovacion, y solamente cu innovacion nos por logra un desaroyo socio-economico duradero y un finansas balansa. Pesey nos mester inverti den innovacion como pais y como gobierno pa por crea e ambicion necesario pa ta exitoso y pa keda competitivo cu otro paisnan rond mundo, sino nos ta risca di bay mas atras”, Prome Minister Evelyn Wever-Croes a duna di conoce den su discurso.

ARUBA INNOVA 2030
E modelo nacional di innovacion ta uno integral y lo acapara tur sector. E plan nacional di innovacion, Aruba Innova 2030, ta basa riba un plataforma nacional di colaboracion entre sector publico, sector priva, sector civico, sector academico y nos comunidad. Durante e dia di awe varios tema di prioridad lo wordo discuti den mas detaye.
Innovacion sigur lo ta e oxigeno, pero pa accelera crecemento di nos economia realmente ta rekeri un plan integral cu accionnan concreto. Tin un lista largo di acion y hopi ya caba ta den movecion pa 2018. Nos kier uza e oportunidad di awe pa hunto cu boso akinan pa valida e prioridadnan y proyectonan cu nos a indentifica como gobierno pa cu e proximo 3 pa 4 añanan. Gobierno por haci’e su mes, pero e impacto y acceptacion ta mas grandi si boso valida esaki.

Mi semper ta bisa, Aruba tin calidadnan unico y mas cu tur cos, nos ta conoci pa nos curashi y espirito di renobacion. Tur esaki ta tera fertil pa innovacion y cambio. Den union nos por surpasa cualkier reto y sali un pais mas fuerte cu un desaroyo ehemplar. Un isla ta conoci pa su desaroyo innovativo, un isla di solucion.”, Prome Minister Evelyn Wever-Croes a finalisa su discurso.