Integridad ta e base di gobernacion di e coalicion MEP-POR-RED. Integridad ta necesario pa combati asuntonan cu no ta bayendo bon pero alavez ta hopi necesario pa asina e ser humano por distingui kico ta bon y kico ta malo. Den esaki ta hunga un rol e confiansa, orguyo pa bo trabao, promove moral y amistad. Pero bo no por logra integridad solamente riba mensahe di moralidad pero door di crea e condicionnan ideal pa cosnan malo no pasa. Y esaki den bista con ultimo añanan decisionnan a ser tuma door di ministernan y tambe e base di democracia cu ta parlamento no a actua debidamente den nan rol pa por controla gobierno. Y ambos, tanto gobierno como parlamento a tuma decisionnan dudoso y sin por hustifica pakico a haci esaki, cu a pone un mancha scur riba nos constelacion democratico na Aruba. Y netamente esakinan ta e motibonan pakico nos no por keda hiba e mesun politica anticua.
Screening ministernan
Y pa yuda duna contenido na e punto di salida di e gobernacion actual cu tin come base e integridad, mi persona como parlamentario hoben cu kier wak cambio den nos funcionamento di parlamento pero tambe di nos gobernantenan a dedica den su prome 6 lunanan sacrificando tur cos pa por a entrega dos ley sumamente importante den e area di integridad. E prome ley a ser entrega na maart 2018 cu ta e ley di integridad/screening di candidatonan pa minister, unda cu lo tin un bon screening pa locual ta e funcion di minister y tambe den continuacion di su tarea como minister. Esaki basa riba reglanan estricto y na beneficio di pueblo.
Financiamento partidonan politico
Di dos ley a ser entrega door di mi persona dia 22 di mei 2018. Esaki ta un concepto di ley unda cu lo bay na controla finansa di partidonan politico y tambe di candidatonan. Unda cu como candidato di un partido politico tin di duna di conoce exactamente di unda su fondo a bin. Esaki ta sirbi pa mas hoben por ser motiva pa por drenta den politica y ta brinda nan e oportunidad di por haci un carera husto cu locual no tin ya cu esaki mas bien ta basa riba populismo y cu no a bay pa mas calidad.
Cu e dos conceptonan di ley aki mi ta duna contenido na locual ta biba den comunidad cu ta decepciona den politiconan y politica unda cu nos cu ta den parlamento actual ta trata na trece e confiansa bek y duna e pueblo speransa cu no solamente socialmente, pero economicamente y financieramente nos por supera e crisisnan aki pero sigur e crisis di confiansa den gobernantenan y parlamentarionan.
