Home » Parlamentario Edgard Vrolijk di MEP: “Reglanan di bon gobernacion ta esencial pa gobierno pero tambe pa e trabao di parlamento.”

Parlamentario Edgard Vrolijk di MEP: “Reglanan di bon gobernacion ta esencial pa gobierno pero tambe pa e trabao di parlamento.”

by Admin
0 comment 107 views

 

Na Aruba nos conoce un sistema di democracia parlamentario, unda cu pueblo cada cuatro aña segun nos constitucion ta scoge su representantenan. Pa ser scogi como e voz di pueblo ta un honor. Nos cada un ta sali di diferente signatura politico y di diferente idealnan y tin  como unico meta pa sirbi nos isla Aruba y percura pa por tin un futuro pa e generacionnan cu ta bin. Nos deber ta duna contenido na e Trias Politica unda cu parlamento tin di asumi su rol di traha leynan y controla gobierno. Reglanan di bon gobernacion ta esencial pa gobierno pero tambe pa e trabao di parlamento. Unda cu e prlamentarionan tin di tuma nan rol manera mester ta pa asina garantisa cu nos Trias politica por funciona y pa por garantisa continuidad pero tambe mantencion di nos democracia parlamentario na Aruba.

 

Trece e berdad pa pueblo

Den esaki nos constitucion pero tambe reglanan di bon gobernacion ta duna nos diferente forma pa por hiba un bon control riba gobierno. Un di nan ta e derecho di haci preguntanan por escrito na ministernan y tambe preguntanan durante un reunion publico. Esakinan ta momentonan sumanente importante pa pueblo por wak cu su mesun wowo y scucha ki ta ser treci dilanti den e debatenan y cu si esakinan ta di calidad of no. Ami como parlamentario ta haci uso di tur e oportunidadnan aki pa por haci preguntanan, cuestiona pero sigur trece claridad pa locual tabata cosnan dudoso den e gobernacion anterior. No ta tur hende ta gusta pero pami ta importante pa trece e berdad pa pueblo pero lo mas importante na un bon manera sin bay na ofende niun hende y no bay riba familiarnan cu no tin nada di haber cu nos den Parlamento.

 

Actuacion infantil di Lampe

Pero tin otro politiconan cu ta falta pueblo respet door di no bay trabao pero tambe ta atende reunionnan sin hiba ni un boca di palabra y ta bin sinta un rato djis pa wak nan presencia y bay cas. Un di e parlamentarionan cu mas ta sobresali pa su ausencia na pia di trabao y pa vocifera su opinion den reunion ta parlamentario sr. Micheal Lampe. Su persona ta opta pa no hiba palabra pa despues haci uso di prensa pa por yama tur esnan cu a sostene un crisisheffing y cual ta e prome paso pa un finansa publico sano y sostenibel di pais Aruba, ta yama nan pa stempelparlament. Ta di lamenta ya cu a spera un mihor nivel di e hoben aki pero cu e kier of no, el a pega cu e mesun mala mañanan di su antepasadonan politico di AVP. Sigur un actuacion infantil cu ta bin di un persona cu a keda 15 ora sin hiba palabra ni ta presente na e reunion y pa despues bin skirbi cosnan asina den prensa.

 

Credibilidad parlamentario

E tipo di comportacionnan aki a haci cu nos credibilidad parlamentario ta awo den duda y ta crea cu awo tur e parlamentarionan ta un stempelparlament. Pero mas bien parlamentarionan manera Michael Lampe awe ta muestra di ta un carne cu ta haci locual esnan cu ta mand’e reacciona awe y sigur e tin tur sintomanan di un parlamentario cu facilmente por ser catalogisa como un stempelparlamentario. Esakinan ta motibo pakico ta crea hopi duda den funcionamento di parlamento y mi ta lamenta esaki profundamente pasobra ami sigur y mi fraccion tambe ta lucha tur dia pa lanta e nivel y haci nos trabao manera debe ser unda nos ta prepara nos mes debidamente, caminda ta cuestiona gobierno y mas cu claro kier sa kico a pasa durante 8 aña pasobra pueblo tambe kier sa.

Un biaha mas mi ta haci un apelacion na e hobennan manera Michael Lampe pa trata na hiba politica na un otro manera pa asina pueblo por crea confiansa un biaha mas den politiconan.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio