Parlamentario Alan Howell: Polisnan di Bario mester ta personanan campeon den tur sentido Nan lo contribui na trece trankilidad bek den nos barionan

Parlamentario Alan Howell durante conferencia di prensa di Fraccion di POR a elabora riba e concepto di Polis di Bario. El a bisa cu e ta algo cu a copia parcialmente for di Hulanda y a origina tempo cu Sr. Rudy Croes tabata Minister di Husticia y tambe e tempo ey Minister di Infrastructura Marisol Lopez-Tromp cu tabatin e encargo di FCCA bou di dje. A bin cu e idea pa tin polisnan den bario, uzando e facilidadnan di FCCA den e diferente barionan. Alan Howell mes a forma parti di diferente grupo di trabou y Cuerpo Policial a manda varios persona Hulanda cu a postula nan mes pa por traha como polis di bario.
E ta bisa cu Polis di Bario ta esencial pasobra e tin un funcion manera un ‘octopus’ pa Cuerpo Policial. Dunando ehempel, el a bisa cu den hopi bario tin cierto cosnansa ta pasa, manera bendemento di droga, habitantenan cu ta tira atraco, habitantenan cu ta pedofiel of te hasta crimen organisa.
E Polis di Bario mester ta un persona campeon den tur sentido. Banda di conoce bon su trabou como polis, e mester ta un persona cu sa con pa drenta hende, e mester ta e miho amigo den e bario y por bati porta y drenta cualkier cas den e bario, bebe un coffee y scucha. Esaki ta condicionnan necesario pasobra na momento cu e polis di bario tin su strategia con pa acerca hende y cu hende por acerke, el lo bira un fuente di informacion hopi importante pa Cuerpo Policial pa atende cu cualkier tipo di criminalidad manera menciona ariba. Di otro banda, den otro casonan menor, e mes lo por tuma e pasonan necesario.
Adicionalmente Alan Howell a splica cu ta importante pa e polisnan di bario ta presente durante e warda den dia, debi cu contrario na pensamento di hopi, e hortamentonan den cas ta tuma lugar mas tanto den dia, ora hendenan no ta na cas. Pero, dependiendo di e casonan nan lo por tey tambe den e warda di anochi cu ta core di 4 pa 12 y den casonan necesario por keda of core e warda di marduga. Loke ta importante ta cu e polis di bario mester ta disponibel y visibel (den e bario) na tur momento durante dia, sea na su post, via su celular of via centrale post.
Polis di Bario a funciona na comienso hopi bon, pero durante gobernacion anterior esaki a pega. Parlamentario di POR ta bisa cu esaki lo a pasa pasobra sea e Minister di Husticia anterior no a compronde e concepto of no a mira e importancia di e proyecto aki. Poco poco a mira cu e proyecto di Polis di Bario a debilita…a mira con e oficinanan a cuminsa bay atras te na tal punto cu e polis di bario no por tabata presente den e oficina y ademas no tabata conta cu e material necesario pa por haci e trabou manera computer, mesa of stul drechi. Howell por a compronde cu hasta e placa di huur cu mester a bay pa FCCA no tabata yega su destinacion.
Den campaña Alan Howell mes a priminti cu na momento cu partido POR drenta Gobierno, lo zorg pa habri e polisnan di bario un pa un bek pa contribui na trece trankilidad un biaha mas pa nos ciudadanonan. E ta contento di mira cu Minister di Husticia Andin Bikker si ta compronde con importante e proyecto aki ta y tambe cu e ta mira e importancia di inversion den siguridad, unda cu a presupuesta 200 miyon den e area di husticia. Pronto mas Polis di Bario lo mira lus di dia un biaha mas pa mehora e siguridad di e barionan di Aruba.