Minister Xiomara Ruiz-Maduro: GOBIERNO DI ARUBA KIER SU PROPIO ORGANO PA HACI SUPERVISION

ORANJESTAD – Durante conferencia di Prensa Minister señora Xiomara Ruiz-Maduro a elabora riba e raport di Cft riba Presupuesto 2018 di 11 di mei cu a bira publico dia 1 di juni ultimo. Un di e preocupacionnan cu CFT a trece dilanti ta cu te ainda no tin un acuerdo nobo cu Hulanda pa locual ta trata e supervision financiero y tambe e normanan pa deficit y debe pa e proximo añanan.
Minister Ruiz-Maduro den conferencia di prensa a splica cu na e momentonan aki Minister Presidente Sra. Evelyn Wever-Croes ta na Hulanda hibando combersacionnan cu Secretario di Estado encarga cu Asunto di Reino Sr. Knops, pa asina riba nivel politico yega na un acuerdo con nos ta sigui dilanti. Ta negoshando riba e normanan pa deficit y debe, e supervision di Cft pa algun aña mas y riba e propio esfuersonan cu Aruba kier haci pa yega na nos propio begrotingskamer, cual lo ta e organo pa haci supervision financiero aki na Aruba. Mescos cu paisnan conoce su Hoge Colleges van Staat, manera Parlamento, Algemene Rekenkamer y Raad van Advies, bo tin tambe e Begrotingskamer. E gobierno aki tin e deseo di tin su propio organo di supervision. Pa awor aki tin Cft y esaki ta parti di negociacion cu Minister President ta trahando riba dje. Riba nivel gubernamental for di un luna pasa caba tin negociacionnan extenso andando y awor esaki a escala na e parti politico, caminda decisionnan mester wordo tuma. Na su yegada Minister Presidente lo bay duna mas detayes di e negocacionnan hiba y lo amplia mas riba e deseo pa Aruba por tin su propio organo di supervicion financiero segun Minister Ruiz-Maduro.