E ciudadano di mas grandi na Aruba
ORANJESTAD, Aruba: Pa hopi hende yega e edad di 100 aña ta un bendicion y aki na Aruba nos tin Maria “Mai” Anette Maduro-Lampe cu recientemente a yega e bunita edad di 109 aña. Pa famia Maduro y Lampe esaki tabata un bendicion, unda cu e famia a bini hunto y celebra e dia. Mai Maduro-Lampe ta e señora di mas bieu aki na Aruba y e famia ta contento y bendiciona pa tin nan mama, tanta, wela y bisawela hunto cu nan.
Dia 26 di Mei 1909, Willem Hendrik Lampe y Felipina Lampe-Maduro a haya nan yiu muhe Maria Anette Lampe, kende pa hopi tabata yama pa cariño Mai. Anette a casa cu Mauricio Maduro y nan a haya diescinco yiu, di cual recientemente 1 a fayece. Anette Maduro-Lampe ta un señora fuerte, perseverante y a bira viuda cu su 55 aña di edad. E no a rindi y a lucha bay dilanti pa saca su famia padilanti. E ta un persona balente y nunca e tabatin un trabou, pero semper a traha duro na cas cuidando su famia y a lanta tur cu amor. Pa henter e famia, Anette Maduro-Lampe ta un ehempel, pasobra e ta un luchado y tur dia por mira esey.
E famia di Anette Maduro-Lampe a crece y awendia tin 4 generacion. E prome generacion ta su 15 yiunan, 2 di generacion di 50 nieto, di 3 generacion cu 79 bisanieto y ultimo generacion di 59 tataranieto. Tur su generacion el a lanta nan cu norma y balornan, tambe a mustra tur kico ta e bon y malo. Anette ta un persona cu semper a lucha y boga p’e union den famia keda estrecho, pero tambe cu tur hende den e famia semper t’ey pa otro. Tur hende por mira e amor y union entre tur su yiunan.
Diasabra ultimo, esta 26 di Mei, e famia a bini hunto y den seno familiar a celebra 109 aña di edad di Anette Maduro-Lampe. A celebra un bunita sirbishi di misa dor di Pader Jairo y a pidi Papa Dios pa bendiciona Maria Anette Maduro-Lampe cu hopi aña di salud. E tabata un fiel bishitante di Pader Jairo su gran parokial di Misa La Birgen Fatima na di Dakota.
Famia Maduro y Lampe ta desea nan ser keri Maria y full su famia hopi mas bendicion forsa y salud pa mas aña di bida.