Prome Minister Evelyn Wever-Croes ta na Hulanda pa varios bishita di trabou cu e bishita principal cu Rey Willem Alexander.
Ta di lamenta, Prome Minister ta bisa cu mientras e ta na Hulanda cu un meta pa reestablece e confiansa bek, oponentenan ta difundiendo cantidad di noticianan falso pa purba desvia atencion. E mandatario ta bisa cu e trabounan cu mester haci na Hulanda ta grandi y hopi serio. Lo tuma hopi pa gana e confiansa bek di e Hulandesnan. Y rumornan falso lo no bay stroba e mandatario pero si el a reacciona den corto pa aclarea e rumornan aki.
NO A HIBA UN DELEGACION HULANDA:
Prome Minister ta aclarea cu el a biaha pa Hulanda su so, sin niun delegacion cu n’e. Su casa ta compañe den e biahe pero e no ta parti di niun delegacion. E Premier di Aruba ta trahando na Hulanda mientras su conseheronan ta na Aruba ta consehando e desde aki mes desde oranan di madruga. Nan ta cla y pendiente pa duna conseho na tur momento di dia. E Gobierno aki ta bahando gasto uzando technologia pa traha hunto enbes di biaha hunto.
NO TIN NIUN BODYGUARD CERA:
Specificamente, Prome Minister a refiri na e medio di comunicacion 24ora.com cu a trece den su plataforma di noticia online cu a skirbi cu un bodyguard di Prome Minister ta deteni. Prome Minister a enfatisa cu esaki ta un noticia falso y hopi baho. Pa prome, e mandatario no tin bodyguard. Pero si durante campaña tawata tin hendenan cu a fungi como tal. No tin niun hende cu a campaña cu Prome Minister of cu tawata su bodyguard cu ta deteni of cu tawata deteni. Den e caso aki, e plataforma di noticia en cuestion ta referi na un persona cu den pasado a campaña p’e hopi aña atras pero sigur den e ultimo campaña no a campaña mas y no a forma parti di e team di Prome Minister.
Prome Minister den e caso di e persona deteni aki ta bisa pa laga husticia core su curso. Y manera semper e mandatario a indica, cu esun cu comete un eror, mester sinta riba su blaar.
“Mi no a drenta politica pa perhudica niun hende y sigur no pa sali na defensa di un of otro persona cu ta comete eror. Den e caso aki ta conta mesun cos. Pa mala suerte di e noticia aki y di 24ora.com, ami no tin ningun bodyguard cu ta deteni tampoco niun hende cu a campaña pa mi ta deteni awo of a ser deteni. Esaki ta un rumor falso di nos oponentenan mustrando nan desesperacion. Nan sa cu mi ta na Hulanda. Nan sa cu mi tin mester di tur atencion pa gana confiansa bek di e Hulandesnan. Cu e noticianan falso aki nan ta purba di desvia mi atencion. Pero nan lo no logra,” Prome Minister Evelyn Wever-Croes a laga sa.