Den e ultimo simannan prome cu e tratamento di e BAVP-heffing y tambe despues di esaki, nos por a mira con parlamentarionan di AVP den un ansha y desesperacion total kier sigui tira santo den wowo di pueblo y p’asina trata di tapa nan derochamento di placa cu nan a comete durante e ultimo 8 añanan. Ta p’esey mes partido MEP no ta cansa y lo sigui conscientisa nos pueblo di e desaster financiero cu AVP a causa e pais aki y pa pueblo nunca mas pone e destructornan aki den stoel di gobernacion.
Deficitnan acumula di 1.7 biyon florin
Echo ta cu tur e actonan destructivo aki a inicia bao di e prome gobernacion di Mike Eman, esta di 2010-2014 y cual a conduci cu na 2014 mes Gabinete Mike Eman a haya un Aanwijzing, KB y finalmente un CAFT riba su lomba. Cifranan financiero no ta gaña ya cu durante apenas 5 aña di Gabinete Mike Eman y bao di e ex-Minister di Finanzas Mike de Meza a ser crea deficitnan increibel, nunca bisto den historia di nos pais y cu recordnan tanto na 2012 como 2014 di riba 400 miyon florin! Den e 5 añanan aki so un deficit acumulativo a ser crea di 1696 miyon florin, pues di 1.7 biyon florin y cual nos por mira den e tabel adhunto! Ta mas cu logico tambe cu nos debe nacional cu na 2009 tabata 2.2 biyon florin, na 2014 ya a alcansa e cifra espantoso di 3.9 biyon florin y cual aumento ta cuadra completamente cu e deficitnan acumulativo di 1.7 biyon florin. Pues mester conclui cu e desaster mayor pa nos pais a sosode den e periodo di 2010 pa 2014! Tur hende cu sano huicio por mira esaki, sinembargo ta poco parlamentario ignorante y incapacita di AVP so manera avestruz ta hinca cada vez nan cabez den tera, no kier mira esaki y ta keda papia y skirbi disparate tur dia bay.
Unda e 720 miyon a bay?
Partido MEP ta keda di opinion cu e deficitnan acumulativo di 1.7 biyon florin tabata innecesario durante e periodo cortico di 2010 pa 2014. Pakico e ponencia aki? E motibo ta cu na momento cu partido AVP a asumi gobernacion na final di 2009, nan a haya e situacion financiero den un estado manehabel, un caha di gobierno can can cu placa ricibi di Plant N.V.(250 miyon florin), BBO riba export di Valero (280 miyon florin), Fondo Desaroyo Arubano (190 miyon florin) y cu den nan tres so a suma na 720 miyon florin, sin conta acerca e ganashi di Banco Central y e BBO local. Partido MEP tin añanan largo caba ta puntra AVP na kico nan a gasta e 720 miyon florin aki den un tempo record asina? Malgastando e suma aki completamente, nan a cuminsa fia manera mundo ta bay caba pa un suma di 1.7 biyon florin durante 2010-2014. Pero te cu awe tur e parlamentarionan di AVP ta bira mudo y sordo ora nan mester contesta e pregunta aki: Unda e 720 miyon florin a bay?
Ta p’esey mes henter fraccion di AVP mester cuminsa realisa cu ta nan partido a haci un daño financiero ireparabel na nos pais y cu lo dura por lo menos te cu aña 2040, 22 aña mas y 5 otro gobernacion pa nos pais por yega bek na e debe cu gobierno di MEP a laga atras na 2009, esta di 40% di nos GDP. Pues stop cu boso politica barata di hunga pa Hudas y biba cu e realidad cu ta boso partido a hinca nos pais den e desaster aki. No stroba, djis para un banda y wak con e gobierno actual manera ta custumber caba lo ruim op boso boel un biaha mas.