Mayoria den Parlamento a aproba e ley di ‘coalitieheffing’ cu ta un ley cu ta regla gran parti di e suma di 130 miyon florin cu gobierno tin presupuesta pa aña 2018 na entrada pa financia su gastonan adicional di 125 miyon compara cu realisacion di 2017, Parlamentario pa fraccion di AVP, sr Richard Arends a mustra. “E transicion pa mas impuesto indirecto sin cu tin compensacion debido pa esunnan di mas vulnerabel por tin repercusion hopi pisa pa esunnan di mesun recurso” Durante ocho aña Gabinetenan Mike Eman a hiba un maneho socio-economico caminda cu a sa di aumenta e poder di compra cu 11% pa esunnan cu un entrada di menos di 2500 florin pa luna.
“E ley aki ta mishi den cartera di famianan; un ley caminda e compensacion no ta completo; un ley caminda pensionadonan ta wordo bisa cu nan poder di compra ta wordo mehora dor di reduccion di prima di AZV pero di otro banda ta nan mes tin cu financia esaki ya cu nan ‘reparatietoeslag’ ta cay afo. “Awe a elimina e reparatietoeslag pa mayoria di e pensionadonan y no tin compensacion pa esunnan den onderstand ni tampoco ambtenaar nan. Ademas ta aumenta e ‘cost of doing business’ na Aruba y ta perhudica e competividad riba nos mercado.” Nos ta lamenta y nos a expresa nos preocupacionnan pero e ley aki tambe ta aumenta e costo di haci negoshi aki na Aruba.
E ley di BBO tin implicacion serio pa loke ta trata servicionan financiero, tambe acuerdonan di seguronan comercial manera seguro di auto y di biahe pasobra ta bay cobra BBO y BAZV mas halto. Esaki ta yega na e empresario chikito, ta yega na e ‘young profesional’ y ta yega na esun cu ta traha independientemente y no ta duna e sosten necesario na e 4 top sector cu nos a identifica cu ta wordo desaroya y ta wordo sosteni dor di empresarionan chikito y mediano.
Anto ni di papia di e forma con e ley aki a wordo regla ya cu diahuebs anochi e ley a yega Parlamento y ya caba diamars anochi e ley a wordo aproba despues cu diamars mainta fraccion di AVP a bay cerca Gobernador caminda nos a haci denuncia pa e proceso aki.
Ta un ley cu ta cambia 13 ley, un embergadura masha grandi mes, sinembargo no a duna Parlamento suficiente tempo pa por studia esaki y obviamente ta un ley di medida cu a wordo introduci ciegamente sin ningun conseho, sin ningun consulta y sin ningun proyeccion macro economico pa su efectonan,” Parlamentario Richard Arends a declara despues cu e ley a wordo aproba diamars anochi.
Nos ta lamenta e proceso con e ley aki a wordo pasa y nos a expresa esaki tambe pero un mayoria den Parlamento a aproba esaki pero nos lo wak na momento cu e medidanan aki tin nan efecto nos lo sigui scucha loke pueblo ta bisa nos, nos lo sigui scucha y tende dolornan y preocupacionnan di pueblo y nos lo trece esakinan dilanti.