Home » Parlamentario Marlon Sneek Gobierno di MEP a logra su soño cu ley cu saca 125 miyon for di pueblo

Parlamentario Marlon Sneek Gobierno di MEP a logra su soño cu ley cu saca 125 miyon for di pueblo

by Admin
0 comment 71 views

Fraccion di AVP no a sostene e ley di aumento d BBP y BAZV ya cu e forma d procede di gobierno, tabata carece di tur seriedad y responsabilidad pa un cambio d ley cu lo afecta e situacion financiero di pueblo.
E embergadura di e ley, e consecuencianan serio cu esaki ta bay trece cune, ta di tal indole cu esaki mester a wordo atendi den un forma mucho mas serio pero gobierno a dicidi pa ‘bulldoze’ e ley aki y apesar di ta papia tur dia di transpararencia y bon gobernacion, nan no a duna ningun instancia of organizacionan oportunidad pa forma parti di e discusion riba contenido di e ley y su consencuencianan.
Lider di fraccion di AVP, sr Marln Sneek a mustra na Bon Dia Aruba cu tabata dificil pa fraccion di AVP sostene un ley asina, cu na prome luga ta sirbi pa ranca placa di cartera di tur ciudadano riba e isla aki, pero na mes momento e forma con gobierno kier a impone e cambio di ley aki, ta uno dictatorial y anti democratico.
“Ta un ley cu a drenta Parlamento pa 6’or diahuebs atardi y ya pa diabierna a manda yama un Centrale Commissie den cual reunion a stipula cu dialuna 11’or di mainta mester entrega pregunta y fraccion di AVP a cumpli cu e peticion aki y a entrega un cantidad di pregunta riba e cambio di ley aki.
Ya pa 5’or atardi nos ta wordo informa cu e contestanan a drenta y cu e reunion ta wordo yama pa 8’or di diamars mainta pero ora cu nos a haya e asina yama ‘nota naar aanleiding van het verslag’ cu mester tabata e contestanan di gobierno riba pregunanan cu nos a haci, a bin tuma nota cu solamente 16 pregunta di un total di 235 pregunta cu fraccion di AVP a formula, a wordo contesta.
Esey caba ta mustra cu e gobierno aki no ta serio cu e cos aki y banda di tur esaki nos por a mira tambe cu diferente gremio a sali dilanti y bisa bon cla cu nan no tabata parti di henter e proceso aki.
No a puntra ningun hende, no a informa ningun hende y a hisa buta pasobra den e ley aki in cantidad di cos scondi pa pueblo y mesora despues cu nan a pasa e ley aki diamars anochi, a cuminsa cu e show pa purba di haci propaganda pa mal informa pueblo riba kico realmente e ley aki a nifica pa entre otro esunnan cu ta cobra un pensioen.
E ley aki ta subi gasto pa cualkier ciudadano y si nos tuma un ehempel manera esunnan cu ta uza celular pre-paid cu tin cu cumpra un carchi, awor tin cu bay paga BBO riba e carchinan aki tambe.
Ta un mdida pa ranca 125 miyon florin for di saco di pueblo y e 125 miyon aki ta bay pa cubri aumento di gasto di e gobierno aki manera cu e rapport di dia 18 di april do CAFT den cual a pidi gobierno mas splicacion, den cual ta ser mustra cu gran mayoria di aumento di gastonan di e gobierno aki, ta basa riba nan maneho.
Diamars durante di e reunion Minister di Finansa, sra Xiomara Ruiz Maduro a confirma esaki tambe bisando cu e gabinete kier haci cos y di un caminda e placa aki mester bin, pues e aumento di BBO no tin nada di haber cu debenan bieu, pero cu nan tin mester di haci inversionnan, nan kier haci cosnan y di un caminda e placa aki tin cu bin y gobierno a dicidi y scoge cu nan ta bay hinca man den cartera di pueblo.
Loke ta hopi serio den henter e asunto aki, ta e wega cu ta wordo hunga cu pensionadonan y e falta di seriedad aki a wordo confirma pa Prome Minister Evelyne Wever Croes, kende a confirma diamars ultimo cu nos tin un ‘stempel parlament’ ora cu prome cu e ley a wordo aproba despues di 11’or y 30 di anochi, su persona a pone un noticia riba su facebook pa 10.10 di anochi, a felicita pensionadonan informando nan cu su gobierno a reduci nan pago di prima di AZV di 10.5% pa 6.5% mustrando cu ya caba su persona tabata sa cu fraccionnan cu ta sostene gobierno, a aproba e ley aki caba.
Ta algo serio pero hopi serio ora c’un Minister Presidente ta presta su mes pa sinta gaña nos hendenan ora cu e bisa den Parlamento y riba su facebook cu ta bay tin un rebaho riba e prima di AZV.
Sinembargo ora cu nos a puntra Minister di Finansa durante di e reunion si e hendenan cu ta cobra un pensioen di 1107 cu ta un pensioen di soltero si e pensionadonan aki lo bay sinti e diferencia aki, si nan lo bay haya e placa aki bek, si nan lo sinti e rebaho di 4%?
Contesta di e Minister tabata categorico bisanco cu NO, ya cu ta SVB ta paga e prima aki y no ta pensionadonan ya cu a SVB ta paga esaki pa nan y ta SVB lo keda cu e placa aki.
Ta cosnan cu ta inaceptabel, sigur ora cu como gobierno ta manipula cu nos hendenan, cu nos grandinan den un forma asina inhusto y increibel y ta algo cu nos ta denuncia y rechasa totalmente,” Parlamentario Marlon Sneek a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio