Home » Rocco Tjon: Reunion Publico riba Ley di Crisisheffing”

Rocco Tjon: Reunion Publico riba Ley di Crisisheffing”

by Admin
0 comment 80 views

 

REUNION PUBLICO

Diamars Parlamento di Aruba a dicidi riba futuro di pais Aruba. E decision cu nos a tuma tawata necesario pa salvaguardia nos autonomia. Esaki door cu e mal maneho di Mike Eman a conduci cu nos a wordo menasa cu un “aanwijzing”.

 

Cambionan fundamental ta necesario pa pone e trein cu yama Aruba, bek riba rails, despues cu e mal maneho di Mike Eman a laga e trein “ontspoor”.

 

Importante ta pa pueblo sa cu e detayenan di e “crisisheffing” a forma parti di e Financieel Economisch Memorandum (FEM) cu a wordo presenta y trata durante presupuesto caba. Partido MEP na dicho reunion a haci mas cu 1000 pregunta pa haya sa ki efecto e crisisheffing lo tin riba economia y pueblo en general.

 

Aprobacion di e ley ta pa percura cu nos yiunan haya un chens husto riba exito den nan bida. Pa nan no bira victima di e decadencia social. Y pa esnan cu ta sufri di quebrante di salud haya un mihor cuido medico. Pa e peso riba pueblo wordo carga na un manera husto. Y pesey den e FEM a tene cuenta cu compensacion.

 

FALTA DI SERIEDAD DI OPOSICION

Partido MEP ta lamenta cu tin falta di seriedad di partido AVP. Durante e reunion publico solamente 4 persona di AVP a debati y riba peticion por escrito di fraccion di MEP pa bin cu alternativanan, alternativanan cu nan a bisa cu nan tin, ainda nos ta warda.

 

Mas lamentabel ta cu di un banda partido AVP ta pidi si tin un estudio di empacto a wordo haci, pero na mes momento ta entrega un amienda den cual nan ta insinua cu caida di poder di compra supuestamente lo ta 10%. Riba kico e cifra aki ta basa, si AVP mes a puntra si tin un estudio a wordo haci?

 

Pueblo mester sa cu durante tratamento di presupuesto, riba peticion di MEP,  informacion a wordo duna cu segun estudio haci door di Centraal Bureau Statistiek (Aruba) e crisisheffing su impacto riba e poder di compra lo ta 1.7% pa 2018.

 

Adicional partido AVP ta tilda e parlamento di ta un “stempelparlement”, pero na mes momento ta aproba amienda di MEP riba e ley.

 

RUMBO NOBO PA ARUBA

Rapportnan di instancianan imparcial for di basta aña (2013 bin ariba) ta indica cu mester bin aumento den entrada. A indica basta aña caba pa introduci of aumenta entradanan fiscal.

 

Pa nos cambia locual a bay hopi aña robes nos mester wanta firme na nos principionan. Principionan cu lo percura pa oportunidadnan husto pa tur ciudadano. Cada ciudadano mester por confia cu e parlamento aki ta traha na nan bienestar. Y p’esey nos lo percura pa eherce nos trabou di controla. Durante un reunion publico na augustus, parlamento lo evalua e desaroyo pa asina tin transpariencia y si ta necesario adapta y realoca fondo.

 

E decision di diamars no ta pa faborece un partido politico. E decision, uno no popular, ta na bienestar di pais Aruba. E decision ta pa restaura confiansa den politica y cuminsa un rumbo nobo pa Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio