Home » Parlamentario Sue-Ann Ras (MEP): CAFT ta medio complice di desaster financiero di gobierno anterior

Parlamentario Sue-Ann Ras (MEP): CAFT ta medio complice di desaster financiero di gobierno anterior

by Admin
0 comment 90 views

ORANJESTAD – E colegio di supervision financiero CAFT tabata medio complice di e desaster financiero di e gobierno anterior. Asina parlamentario pa partido MEP, Sue-Ann Ras, a bisa durante su disertacion diamars den Parlamento. Segun Ras, tabata decepcionante cu un institucion manera Caft, tabata medio complice di tur e situacion financiero, permitiendo gobierno anterior bin cu cifra ficticio, tocante entrada incidental di entre otro, CITGO, impuesto y kier blo extrapola e impuesto, siendo cu nan sa bon bon, con e sistema di impuesto na Aruba ta hinca den otro.

REFRESCA MEMORIA
Ras a sigui pa refresca e memoria di loke cu e gobierno actual a haya. Entre nan tin, cu:
1. Gobierno anterior a keda sin entrega e presupuesto na tempo violando ley y
CAFT a acepta.
2. Gobierno anterior a sconde tur clase di cifra, pa asina scapa un KB.
3. Gobierno anterior a manipula cu finanza, simplemente pa nan yega te eleccion.
4. E cifranan irealistico y ficticio tabata nan punto fuerte pa sigui endeuda nos pais,
mientras tras di cortina, nan tabata bira miyonario.
5. Tabata facil pa como friends & family, bo inicia un negoshi y asina saca probecho
di varios trabou y cobra suma grandi y esey tabata aceptabel.

“Naturalmente e pregunta cu cualkier persona lo haci ta, ta Pakico? E unico contesta cu mi por haya ta, door di manipula, nan por a logra di hinca miyones den campaña electoral”, Ras a sigui bisa. Segun e parlamentario, e gobierno anterior a regala contract pa haya voto. “Imagina bo, cu placa cu mester tabata destina pa atende cu nos problemanan social, cu nos enseñansa, a haya destinacion pa manipula y beneficia hende, pa haya voto of complace amigo y famia, pa tin un bida di luho. Y awor oposicion hunto cu CAft, ta para critica riba e cantidad di personal, mientras cu e gobierno aki a baha e personal cu 183 hende caba, cu ta ekivalente na 7 miyon florin. Si esey ta zona poco, manera cu a tilda nos gobierno, sikiera ta un comienso,” segun Ras.

PLAN
Segun Ras, tin biaha e ta puntra su mes: “Kico lo tabata e situacion y plan, si nan mes a drenta bek gobierno y mester a deal cu e herencia financiero caotico aki? Con nan lo a resolve e problemanan financiero, social, educacional y laboral, mientras ta manipula cu cifra y expone nos hendenan na peliger y abismo di pobresa. Pobresa den tur sentido di palabra; financiero, emocional, spiritual y intelectual”.

CIFRA
Ras a sigui bisa cu cifra no ta gaña. “Y kisas p’esey mes e gobierno anterior tabata percura pa no bin cu cifra, ya cu tur departamento cu nos a sinta cu ne den e periodo aki, tabata bisa nos: Falta cifra, falta dato, of gobierno no tabata kier pa nan saca e datonan. Y ehempel tin di sobra!”, e parlamentario a sigui bisa.

SIGUI CU CAOS?
Y ta netamente e gobierno y parlamento nobo ta para dilanti un pregunta crucial: “Nos tambe ta bay sigui cu e caos aki, sigui manipula, sigui haci e cosnan populista pa cumpra simpatia di pueblo? Of nos si ta bay atende cu e responsabilidad di goberna nos pais? Nos ta core pa nos responsabilidad manera e gobierno y e parlamentarionan di AVP a haci? Of nos ta bay carga nos responsabilidad, pa mesora despues inverti den nos comunidad? Ta e preguntanan ey nos mester contesta awe,” Ras a finalisa bisando.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio