Hunto nos lo logra e bienestar di nos pueblo cu tanto nos ta anhela.
Presente na e celebracion di dia di Bandera di Haiti diabierna mainta na Hyatt Regency Aruba tawata Gobernador di Aruba señor Alfonso Boekhoudt, Presidente di Parlamento señor Ady Thijsen, miembronan di Parlamento, Ministernan, Vice Consul di Haiti, señor Walfaud Saget y varios otro invitadonan. Prome Minister Evelyn Wever-Croes a duna un discurso hopi elocuente na unda su mensahe principal tawata cu hunto como un solo pueblo nos lo logra e bienestar di nos pueblo.
“Awe, 18 di mei, nos ta hunto aki pa celebra dia di bandera di Haiti. Haiti tin un historia colonial largo. Spaña desde 5 december 1492. Francia despues. Na 1804 Haiti a bira e prome nacion independiente di Latino America y Caribe, despues di un revolucion cu a dura 12 aña. Esaki ta demostra e deseo ferviente di e pueblo di Haiti pa su libertad.
Un pueblo cu kier ta liber, mester di su simbolonan di libertad, y e bandera nacional, cu awe nos ta celebra, ta e simbolo mas importante di libertad di un pais. Haiti ta 758 km leu di Aruba, y apesar di e distancia, nos por nota similaridadnan den e lucha pa libertad cu aki na Aruba tambe a wordo hiba. Talves menos den tamaño, pero di intensidad similar. Y ta un honor pa mi, den nomber di Gobierno di Aruba, di por celebra e fecha importante aki cu boso, mescos cu boso tambe ta celebra hunto cu nos nos dia di Himno y Bandera.
E comunidad di Haiti na Aruba ta data di bastante aña, y varios generacion a contribui na e comunidad multi-cultural di Aruba. Nacionalidad. Varios di boso a laga boso hogar y boso famia, pa bin establece na Aruba, y a haci di Aruba boso hogar. Sr. Betico Croes, kende ta wordo considera e Libertador di Aruba, a bisa cu Arubiano no ta solamente esun cu a nace na Aruba. Si abo a nace na otro pais, y bo a haci Aruba bo hogar, abo tambe ta Arubiano.
Riba e dia nacional di bandera di Haiti mi ta felicita tur cuidadano di Haiti, especialmente esnan residencia na Aruba, y gradici boso pa yuda nos desaroya nos economia. Den e transcurso di añanan hunto nos a experiencia bon tempo y menos bon tempo, y toch boso a keda, demostrando asina boso determinacion pa lucha pa e progreso di boso mes, y di Aruba.
Nos pais ta enfrentando retonan enormemente grandi, retonan financiero, retonan social, retonan economico cu e retraso di reapertura di e refineria. Nos no mester tin miedo di e retonan aki, pasobra nos pais a enfrenta retonan similar den pasado.
Y mescos cu den pasado, e biaha aki tambe mi tin tur confiansa cu nos lo vence e retonan contal cu nos ta uni. Uni nos lo vence e retonan y desafionan. Uni nos lo vence tur obstaculo cu lo crusa den nos caminda, y uni nos lo logra e bienestar di nos pueblo, cu tanto nos ta anhela.
Pabien. Felicitacion. Y cu Dios bendiciona henter e comunidad di Haiti y di Aruba.