Referente e situacion incomodo y innecesario cu a keda registra na DIMAS, unda cu informacion falso a sali cu dicho departamento lo ta dunado algun tipo di asilo politico na ciudadanonan Venezolano, Minister Chris Romero a tuma e pasonan necesario pa cuminsa cu un investigacion pa saca afor di unda e informacion incorecto aki lo a sali.
Segun informacion acumula na prome instante ta apunta cu un locutor di un radio local cu formato na idioma spaño, ta e persona cu lo a propaga e noticia falso di un supuesto asilo politico of amnistia cu DIMAS lo ta dunando pa personanan procedente di Venezuela.
Pa sali di tur duda y no bay tras di rumor, Minister Chris Romero a instrui departamento di DTZ pa pidi grabacion di e programacion di e radio en cuestion.
Si e persona aki a duna dicho informacion incorecto durante su programacion radial, lo bay tuma e pasonan pertinente y den cuadro legal pa cu su accion.
Teniendo transparencia semper como motor principal di Gabinete Wever-Croes, Minister di Telecomunicacion lo haci tur loke ta posibel pa cuminsa pone un stop na e fenomeno di “fake news, cual a keda demostra di tin e poder unico di destrui y haci daño na cualkier comunidad, pais of nacion.